“O‘zbekiston – 2030” strategiyasi: ilm-fan va innovatsion rivojlanish yo‘lidagi muhim qadamlar
2026-01-14 09:40:00 / Yangiliklar
Ayni kunlarda mamlakatimiz taraqqiyotining uzoq muddatli ustuvor yo‘nalishlarini belgilab beruvchi “O‘zbekiston – 2030” strategiyasini takomillashtirish loyihasi jamoatchilik muhokamasiga qo‘yilgan. Mazkur hujjatda barcha sohalar qatori ilm-fan va innovatsion faoliyat yo‘nalishlariga ham alohida e’tibor qaratilib, ushbu soha bo‘yicha qator bandlarga o‘zgartirish va qo‘shimchalar kiritilishi ko‘zda tutilmoqda.
Shu munosabat bilan Innovatsion rivojlanish agentligi markaziy apparatida o‘tkazilgan yig‘ilishda strategiya loyihasiga kiritilayotgan taklif va tashabbuslar atroflicha muhokama etildi. Unda ilmiy-tadqiqot faoliyatini yanada rivojlantirish, innovatsion g‘oyalarni qo‘llab-quvvatlash, ilmiy ishlanmalar va zamonaviy texnologiyalarni yaratish hamda ularni amaliyotga keng joriy etish masalalari muhim ustuvor yo‘nalishlar sifatida qayd etildi.
Ta’kidlanganidek, “O‘zbekiston – 2030” strategiyasi mamlakatimiz kelajagini belgilab beruvchi muhim dasturiy hujjat hisoblanadi. Aynan ushbu strategiya doirasida ilm-fan, ta’lim va innovatsiyalarni rivojlantirish bo‘yicha aniq maqsad va vazifalar belgilab olinmoqda. Xususan, olimlar va yosh tadqiqotchilarni qo‘llab-quvvatlash, ilmiy tadqiqotlar natijalarini ishlab chiqarish va ijtimoiy sohalarga joriy etish, shuningdek, xalqaro ilmiy hamkorlikni kengaytirishga alohida urg‘u berilmoqda.
Yig‘ilish davomida strategiyaning takomillashtirilishi hamda unda ilm-fan va innovatsion sohani rivojlantirishga qaratilgan takliflarning amalga oshirilishi mamlakatimizning uzoq muddatli va barqaror taraqqiyotiga mustahkam zamin yaratishi ta’kidlandi. Jamoatchilik muhokamasi jarayonida bildirilayotgan fikr va takliflar esa strategiyaning yanada mukammal, hayotiy va amaliy ahamiyatga ega bo‘lishiga xizmat qilishi qayd etildi.