IIV Akademiyasi vakillari Huquqni muhofaza qilish akademiyasida yoʻlga qoʻyilgan ilgʻor yondashuvlar bilan tanishdi
2025-11-06 13:35:00 / Yangiliklar
Dastlab taʼlim muassasalari rahbarlari oʻzaro muloqot qilib, yuqori malakali kadrlar tayyorlashda tajriba almashinuvining ahamiyati, ayni yoʻnalishdagi ustuvor vazifalar yuzasidan fikr almashdi.
Muhtaram Prezidentimiz tomonidan taʼlimga mamlakat taraqqiyotining tayanchi sifatida eʼtibor qaratilayotgan hozirgi sharoitda huquqni muhofaza qiluvchi organlar faoliyatini zamonaviy kadrlar bilan takomillashtirib borish muhimligi taʼkidlandi.
«Akademiyamizda taʼlimni amaliyot bilan uzviy holda tashkil etish maqsadida samarali mexanizmlar joriy qilingan. Oʻquv jarayonlarini toʻliq raqamlashtirish boʻyicha jadal ishlar olib borilmoqda.
Ixtisoslik kafedralarimiz hududlardagi ichki ishlar organlariga biriktirilgan boʻlib, professor-oʻqituvchilarimiz tomonidan bitiruvchilarimiz faoliyati muntazam monitoring qilib boriladi.
Maʼlumki, amaliyotda malakali mutaxassis kadrlarga ehtiyoj ortib bormoqda. Shu bois, milliy va xorijiy tajribalarni oʻrgangan holda taʼlim sifatini yanada oshirishni maqsad qilganmiz» – dedi IIV akademiyasi boshligʻi Rustam Xatamov.
Uchrashuvdan soʻng akademiya faoliyati bilan yaqindan tanishildi.
Mehmonlarga bakalavriat va magistratura bosqichlari, mutaxassislik yoʻnalishlari, taʼlim dasturlari, dars mashgʻulotlarida qoʻllanilayotgan innovatsion yondashuvlar, ilmiy salohiyat koʻrsatkichlari, xalqaro hamkorlik aloqalari, shuningdek oʻquv xonalarida yaratilgan sharoitlar, moddiy-texnik bazani rivojlantirish borasida amalga oshirilayotgan ishlar haqida batafsil maʼlumot berildi.
IIV Akademiyasi boshligʻi taʼlimni raqamlashtirish, mashgʻulotlarda sunʼiy intellekt imkoniyatlaridan foydalanish, amaliyot xodimlarini masofaviy oʻqitish, kiberxavfsizlik yoʻnalishida kadrlar tayyorlashga qaratilgan yangiliklarni oʻrganib, ilgʻor jihatlarni ommalashtirish zarurligini qayd etdi.
Tomonlar hamkorlikni kengaytirishga kelishib oldilar.
IIV Akademiyasi Axborot xizmati