Xorazm viloyati Ichki ishlar boshqarmasi huzuridagi Tergov boshqarmasining 9 oyi yakuni boʻyicha hisobot yigʻilishi boʻlib oʻtdi
2025-11-06 13:25:00 / Yangiliklar
Unda boshqarma rahbariyati, shahar va tuman ichki ishlar boʻlimlarining tergov boʻlinmalari rahbarlari hamda barcha tergovchi va surishtiruvchilar ishtirok etdilar.
Yigʻilish avvalo tergov faoliyati samaradorligini tahlil qilish, mavjud kamchiliklarni bartaraf etish va kelgusidagi vazifalarni belgilashga qaratildi.
Hisobot davrida tergov tizimida amalga oshirilgan ishlar, jinoyat ishlarini ochish va ularni sudga oshirish jarayonlari atroflicha muhokama qilindi.
Taʼkidlanishicha, joriy yilning oʻtgan 9 oyi davomida Xorazm viloyatidagi tergov va surishtiruv boʻlinmalari xodimlari tomonidan jinoyatlarni fosh etish, fuqarolarning huquq va qonuniy manfaatlarini himoya qilish, tergov jarayonlarini sifatli va xolisona amalga oshirish yoʻnalishida salmoqli natijalarga erishildi.
Boshqarma rahbariyati tomonidan ayniqsa xodimlarning xizmat intizomi, masʼuliyati, qonun talablariga qatʼiy rioya etish, jinoyat ishlari boʻyicha dalillar bazasini mustahkamlashdagi saʼy-harakatlari alohida eʼtirof etildi.
Shuningdek, tergov jarayonlariga zamonaviy axborot tizimlarini joriy etish, raqamli texnologiyalardan foydalanish, ichki nazoratni kuchaytirish boʻyicha qator vazifalar belgilab olindi.
Yigʻilishda xodimlarning xizmat faoliyatini baholash bilan birga ularning shaxsiy rivojlanishiga ham eʼtibor qaratish zarurligi qayd etildi.
Bu borada, fidoyilik va masʼuliyat bilan xizmat qilayotgan tergovchi hamda surishtiruvchilar, ularning ota-onalari faxriy yorliq, tashakkurnoma va esdalik sovgʻalari bilan taqdirlandi.
Tadbirda taʼkidlanishicha, har bir xodimning muvaffaqiyati ortida uning oilasi, yaqinlari va ustozlarining mehri hamda tarbiyasi mujassam.
Shu sababli, mukofotlash marosimida ota-onalarning mehnatini eʼtirof etish orqali tergov tizimidagi insonparvarlik va mehr-oqibat muhitini mustahkamlashga ham eʼtibor qaratildi.
Yigʻilish yakunida Tergov boshqarmasi rahbariyati tomonidan xodimlar oldiga jinoyatchilikka qarshi kurashda yanada yuqori natijalarga erishish, har bir ishda qonun ustuvorligini taʼminlash, fuqarolarning ishonchini qozonish yoʻnalishida aniq vazifalar qoʻyildi.
Xorazm viloyati IIB Axborot xizmati