O‘zbеkiston Rеspublikаsi Ichki ishlаr vаzirligi

Kattaqoʻrgʻon tumani IIB Migratsiya va fuqarolikni rasmiylashtirish boʻlinmasi katta inspektori, serjant Vohid Boboyevning xizmat faoliyati inson shaxsini tasdiqlovchi hujjat-pasport, ID-kartalar bilan bogʻliq. Kishi bu hujjatsiz koʻplab ishlarni hal qila olmaydi. Kredit va boshqa moliyaviy hamda shartnomaviy hujjatlar bularsiz rasmiylashtirilmaydi.

Shu bois hujjatni rasmiylashtirish jarayoni elektron tizimlar orqali tez va shaffof tarzda amalga oshirilyapti. Fuqarolarni tizimdagi oʻzgarish va yangiliklardan oʻz vaqtida xabardor etish maqsadida tegishli targʻibot-tashviqot ishlari olib borilmoqda.

Baʼzan tugʻilganlik toʻgʻrisidagi guvohnomada yoʻl qoʻyilgan xatolikni tuzatish, ism, sharif yoki familiyani oʻzgartirish, ayrim fuqarolar tomonidan “Pasport yoki ID-kartamni yoʻqotdim, yangisini beringlar”, degan mazmundagi murojaatlar ham boʻlib turadi.

Shunda ularga bu jarayonlar boshqa tegishli idoralar bilan birgalikda rasmiylashtirilishini tushuntiramiz, oʻzimizga tegishli qismini darrov tayyorlab beramiz, — deydi serjant V. Boboyev.

Gohida oʻqishga va ishlashga ketayotgan ayrim fuqarolarimiz xorijiy davlatlarga chiqishda xorijga chiqish pasporti ID-kartasining amal qilish muddatiga qarashmaydi.

Natijada Vatanga qaytishida chegarada muammo paydo boʻladi. Shuning uchun har bir fuqaro shaxsini tasdiqlovchi hujjatlariga eʼtiborli boʻlishi kerak.

Negaki, hujjatda aniqlik boʻlsa, safarda xotirjamlik boʻladi.

©️ “Postda” gazetasi, Umida Mamadaliyeva, Samarqand viloyati.