Yoshlar-kelajak bunyodkori. Xalqaro hamkorlik — tajribalar poydevori
2025-11-03 00:10:00 / Yangiliklar
Katta leytenant Abrorjon Toshpoʻlatov 2019-yilda Toshkent xalqaro Vestminster universitetini tamomlagan. Shuningdek, 2017-yil London shahrida joylashgan “Burlington School” oʻquv muassasasining faxriy bitiruvchisi maqomini ham olgan.
Qisqa muddat pedagogik faoliyat bilan shugʻullangan Abrorjon 2022-yildan ichki ishlar organlarida xizmat faoliyatini olib bormoqda. Dastlab, vazirlikning Xalqaro hamkorlik boshqarmasi protokol boʻlimi katta inspektori, oʻtgan yildan hozirgi kunga qadar esa muhim topshiriqlar boʻyicha inspektor sifatida xizmat qilib kelmoqda.
- Abrorjon yuklatilgan xizmat vazifalarini sidqidildan bajarishga harakat qiladi. Tabiatan vazmin, kamtar, qatʼiyatli va har qanday vaziyatda mustaqil qaror qabul qila oladi. Xizmat faoliyatini qonunchilikka rioya qilgan holda tashkillashtiradi. Hamkasblari orasida alohida hurmat va obroʻ-eʼtiborga ega, — deydi boshqarma boshligʻi, podpolkovnik Abdurashid Alisherov.
Yosh xodim Ichki ishlar vazirligining xorijiy davlatlar huquqni muhofaza qiluvchi organlari bilan hamkorlik aloqalarini rivojlantirishga oʻz hissasini qoʻshib kelmoqda. Mazkur yoʻnalishda oʻnga yaqin huquqiy hujjatlarni ishlab chiqishda faol ishtirok etgan. Anglashuv memorandumlari, bitimlar hamda qator kelishuvlarda uning salmoqli hissasi borligini qayd etish joiz. Katta leytenant Abrorjon Toshpoʻlatov Birlashgan Arab Amirliklari, Eron Islom Respublikasi va Xitoy Xalq Respublikasida xizmat safarlarida boʻlib, xorij tajribasini chuqur oʻrgangan. BAA Politsiya akademiyasida ham malaka oshirgan.
Intiluvchan xodim sport bilan muntazam ravishda shugʻullanib, respublika va jahon miqyosida oʻtkazilgan musobaqalarda yuqori natijalarga erishib kelmoqda. Jumladan, 2015-yil Qozogʻistonda boʻlib oʻtgan Osiyo chempionatida sportning Kombat Aykido turi boʻyicha oltin, 2016-yil Rossiya Federatsiyasining Orenburg shahrida oʻtkazilgan Yevrosiyo chempionatida sportning K-1 turi boʻyicha bronza, 2018-yil Qirgʻiz Respublikasining Oʻsh shahrida MMA boʻyicha professionallar oʻrtasida oʻtkazilgan chempionat gʻolibi boʻlgan. Aynan oʻsha yili Gruziyaning Tbilisi shahrida boʻlib oʻtgan Jahon chempionatida sportning K-1 turi boʻyicha professionallar oʻrtasida oltin medalni ham qoʻlga kiritgan.
Yurtimiz ichki ishlar organlari tizimini xalqaro miqyosida yanada rivojlantirish, xorij davlatlarining huquqni muhofaza qiluvchi organlari bilan har tomonlama manfaatli hamkorliklar oʻrnatilishida jonbozlik koʻrsatib kelayotgan Abrorjonning kelgusi faoliyatida yangidan-yangi zafarlar tilab qolamiz!
Abror POYONOV, oʻz muxbirimiz.