Joriy yilning 15-oktyabr kuni Ichki ishlar vaziri general-leytenant Aziz Tashpulatov hamda Koreya Respublikasining Oʻzbekistondagi Favqulodda va Muxtor elchisi janob Von Do Yon oʻrtasida ehtirom uchrashuvi boʻlib oʻtdi
2025-10-15 12:00:00 / Yangiliklar
Tadbirda Davlatimiz rahbarining “Janubiy Koreya Oʻzbekistonning ishonchli va ustuvor sherigi” – deb eʼtirof etganligi ikki davlat oʻrtasidagi hamkorlik aloqalari oliy darajadagi ishonch va doʻstlikka asoslanganligini namunasi ekanligi taʼkidlandi.
Ikki mamlakat oʻrtasida siyosiy muloqot, madaniy-gumanitar almashuv jarayonlari, savdo-iqtisodiy va investitsiyaviy faoliyat sohalarini rivojlantirish hamda huquqni muhofaza qilish faoliyati borasida koʻplab bitimlar, aniq va manzilli loyihalar amalga oshirilayotganligi urgʻulandi.
Muloqot davomida ikki mamlakat huquqni muhofaza qilish organlari oʻrtasida oʻzaro hamkorlik aloqalarining huquqiy asoslarini mustahkamlash, jinoyatchilikka qarshi kurashish, jamoat tartibi va xavfsizligini taʼminlash, oʻzaro tajriba almashish hamda kadrlar malakasini oshirish kabi hamkorlikka oid masalalar muhokama qilindi.
Doʻstona va konstruktiv ruhda oʻtgan uchrashuv yakunida tomonlar oʻrtasidagi aloqalarni mustahkamlash borasida istiqbolli vazifalar belgilab olindi.