Ichki ishlar vaziri Aziz Tashpulatov Oʻzbekiston Aralash jang sanʼatlari (MMA) assotsiatsiyasi raisi etib saylandi
2025-10-08 13:45:00 / Yangiliklar
Bugun Ichki ishlar vazirligida Oʻzbekiston Aralash jang sanʼatlari (MMA) assotsiatsiyasining navbatdan tashqari saylov konferensiyasi boʻlib oʻtdi. Unda Ichki ishlar vaziri Aziz Tashpulatov, Sport vaziri Adxam Ikramov, Milliy olimpiya qoʻmitasi raisining birinchi oʻrinbosari hamda Osiyo Olimpiya kengashi vitse-prezidenti Otabek Umarov, Milliy olimpiya qoʻmitasi Bosh kotibi Oybek Qosimov, delegat va sportchilar, shuningdek hududiy ichki ishlar organlari rahbarlari ishtirok etdi.
Konferensiyada ikkita asosiy masala koʻrib chiqildi. Dastlab, Aralash jang sanʼatlari assotsiatsiyasiga Oʻzbekiston Pankration va greppling assotsiatsiyasini birlashtirish maʼqullandi. Shundan soʻng Aralash jang sanʼatlari assotsiatsiyasi rahbariyati saylanib, delegatlar tomonidan Oʻzbekiston Respublikasi Ichki ishlar vaziri Aziz Tashpulatovning assotsiatsiya raisligiga nomzodi bir ovozdan qoʻllab-quvvatlandi.
Sport vaziri Adxam Ikramov Ichki ishlar organlarining mamlakatimizda voleybol sport turini rivojlantirish hamda hududlarda yanada ommalashtirish borasidagi hamjihat harakatlarini eʼtirof etgan holda butun yurtimizda minglab yoshlarni qiziqtira olgan aralash jang sanʼatlarini yuqori bosqichga olib chiqishda ham oʻziga xos tajriba mavjudligini taʼkidlab oʻtdi.
Shundan soʻng Aziz Tashpulatov Davlatimiz rahbari tashabbusi bilan sport sohasidagi yaratilayotgan imkoniyatlardan unumli foydalangan holda kelgusida aralash jang sanʼatlarini rivojlantirish borasidagi dastur bilan tanishtirib oʻtdi.
Endilikda Ichki ishlar organlari rahbarlari hududlardagi sport boshqarmalari bilan birgalikda ushbu sport turiga qiziqqan yoshlarni aniqlash hamda ularga zaruriy sharoitlarni yaratib berishga masʼul boʻladi. Bu borada uyushmagan yoshlarga alohida eʼtibor qaratilib, Ichki ishlar vazirligi tasarrufidagi JAR sport sogʻlomlashtirish markazida hamda viloyatlardagi sport majmualarida aralash jang sanʼati bilan shugʻullanuvchi yoshlar va murabbiylar uchun zaruriy infratuzilma tashkil etiladi.
Turli musobaqalar oldidan, shuningdek, muayyan vaqtda sportchilar ichki ishlar organlari tizimidagi tibbiyot muassasalarida bepul tibbiy koʻrikdan oʻtkaziladi. Xalqaro federatsiyalar bilan hamkorlik borasida muzokaralar olib borilib, hakamlar va murabbiylarning malakasini oshirishga alohida eʼtibor qaratiladi.
Milliy olimpiya qoʻmitasi raisining birinchi oʻrinbosari Otabek Umarov ham ichki ishlar organlari xodimlari orasida bu sport turiga qiziquvchilar, uning rivojiga xayrixoh xodimlar va rahbarlar koʻp ekanligini aytib, yoshlar uchun bu yangi imkoniyatlar eshigini ochishiga ishonch bildirdi.
Konferensiyada Ayubxon Raxmatullayev Assotsiatsiya raisining birinchi oʻrinbosari, Shuxrat Anvarov rais oʻrinbosari, Xojiakbar Xakimov Bosh kotib, Murodxon Toʻrayev assotsiatsiyasi ijrochi direktorligiga bir ovozdan saylandi.
Tadbirda shuningdek, aralash jang sanʼati murabbiylarining sport maktablari bilan hamkorligini yoʻlga qoʻyish, hududlarda mazkur sport sohasiga sharoitlar yaratish, oktagonlar tashkil etib, oʻtkaziladigan musobaqalarda muxlislik klublari faoliyati yoʻlga qoʻyish borasida fikrlar bildirildi va tegishli qaror qabul qilindi.