1-oktyabr – Oʻqituvchi va murabbiylar kuni munosabati bilan Oʻzbekiston Respublikasi Ichki ishlar vaziri, general-leytenant Aziz Anvarovich Tashpulatovning bayram tabrigi
2025-10-01 08:55:00 / Yangiliklar
Hurmatli hamkasblar!
Ichki ishlar organlari taʼlim muassasalari professor-oʻqituvchilari, soha faxriylari va ustoz-murabbiylar hamda ularning oila aʼzolarini 1-oktyabr – Oʻqituvchi va murabbiylar kuni bilan samimiy muborakbod etaman.
Ustoz deganda, har birimizning koʻnglimizda chuqur hurmat-ehtirom va cheksiz minnatdorlik tuygʻulari bilan birga, hech qanday boylik bilan oʻlchab boʻlmaydigan qarzdorlik hissi uygʻonadi.
Muhtaram Prezidentimiz Shavkat Miromonovich Mirziyoyev rahbarligida milliy taraqqiyot strategiyamiz asosida boshqa sohalar singari taʼlim tizimida ham tom maʼnoda tarixiy yangilanish amalga oshirilib, ustozlarga koʻrsatilayotgan ehtirom yuksak darajaga koʻtarildi.
Barchamizga maʼlumki, kelajak – zamonaviy bilim bilan qurollangan chinakam vatanparvar avlodnikidir. Biz bu haqiqatni teran anglagan xolda yosh avlodni, sharafli kasbimiz davomchilarini davr bilan hamnafas, har qanday qiyinchilikka bardosh bera oladigan mutaxassislar etib tarbiyalashimiz zarur.
Ishonamanki, vazirligimiz tizimida faoliyat koʻrsatayotgan aziz professor-oʻqituvchilarimiz, qadrli murabbiylarimiz, hayotiy tajriba va amaliy koʻnikmalar egasi boʻlgan ustozlar el-yurt osoyishtaligiga masʼul boʻlgan yosh avlodni tarbiyalashdek sharafli ishga munosib hissalarini qoʻshadilar.
Ushbu shukuhli ayyom munosabati bilan barchangizni chin dildan qutlab, sizlarga sihat-salomatlik, oilaviy baxt, ezgu va sharafli faoliyatingizda ulkan muvaffaqiyatlar tilayman.
Hamisha sogʻu omon boʻling, aziz va mehribon ustozlar!
Aziz Tashpulatov,
Oʻzbekiston Respublikasi Ichki ishlar vaziri,
general-leytenant.