O‘zbеkiston Rеspublikаsi Ichki ishlаr vаzirligi

Yurtimizga har yili sayohat va ziyorat maqsadida dunyoning barcha mintaqasidan millionlab sayyohlar kelayotganligi quvonarli hol albatta. Shu bilan birga ichki turizmning ham yildan-yilga rivojlanib, shaharlararo qisqa muddatli turlar, oilaviy va jamoaviy sayohatlarning ham ortib borayotganligi aholi farovonligining yana bir koʻrishini desak aslo mubolagʻa boʻlmaydi.

Ichki ishlar vazirligi va uning hududiy boʻlinmalarida ham transport va turizm obyektlarida xavfsizlikni taʼminlash boʻyicha doimiy xizmat tashkil etilgan. Bu yoʻnalishda davlatmiz rahbar tomonidan olib borilayotgan islohotlar natijalari, kelgusida rejalashtirilayotgan yangi loyihalar haqida ommaviy axborot vositalarini yaqindan tanishtirish maqsadida Ichki ishlar vazirligi Axborot xizmati tomonidan “Xavfsizlik kafolati — turizm va transportda barqarorlik asosi“ mavzusida press-tur tashkil etildi.

Tadbirga taklif etilgan jamoatchilik faollari, jurnalist va blogerlar Toshkent viloyati Boʻstonliq tumanida joylashgan Xavfsiz turizmni taʼminlash boshqarmasida yaratilgan sharoitlar bilan tanishtirib oʻtildi. Sayyohlarning xotirjam dam olishlari, togʻ yon bagʻrida va suv havzalarida ekstremal sport turlari bilan shugʻullanishlari davomida turli koʻngilsiz hodisalarni oldini olish maqsadida xizmat faoliyatiga tatbiq etilgan zamonaviy texnologiyalar hamda transport vositalari namoyish etildi.

Shundan soʻng IIV Transport va turizm obyektlarida xavfsizlikni taʼminlash departamenti va uning hududiy boʻlinmalari tomonidan joriy yilning oʻtgan davrida olib borilgan xizmat faoliyati natijalari taqdimot qilindi. Boʻstonliq tumanida sayyohlar xavfsizligini taʼminlashda yoʻlga qoʻyilgan tizim va uning boshqaruvi koʻrsatib oʻtildi.

Taʼkidlanganidek, 2025-yil yanvar-iyul oylarida respublikamizga kelgan 7.415.531 nafar chet el fuqarolaridan sayohat maqsadida kelganlari 949.933 nafarni tashkil qilgan. Ichki turizm yoʻnalishida Toshkent shahri, Toshkent, Buxoro, Samarqand, Surxondaryo, Qashqadaryo, Xorazm, Jizzax, va Fargʻonaga viloyatlari jami 30.542.768 nafar mahalliy sayyoh tashrif buyurgan.

Eʼtiborli jihati, Xavfsiz turizmni taʼminlash boʻlinmalari tomonidan 61 ta xorijiy davlat va tashkilotlarning 257 ta delegatsiyasini kutib olish, davomida koʻngilsiz holatlarga yoʻl qoʻyilmagan.

Press-tur yakunida ommaviy axborot vositalari vakillari uchun matbuot anjumani tashkil etildi. Unda IIV hamda Toshkent viloyati IIBBning rahbar va masʼullari ishtirok etdi. jurnalist va blogerlar oʻzlarini qiziqtirgan savollarga javob olishdi.

Transport obyektlari vokzal va aeroportlarda, temir yoʻl izlari hamda ularga tutash boʻlgan hududlarda ham ichki ishlar organlarining doimiy xizmat faoliyati yoʻlga qoʻyilgan boʻlib, ular tomonidan olib borilgan profilaktik ishlar, jinoyatchilikni olini olish borasida amalga oshirilayotgan muhim tadbir haqida toʻxtalib oʻtildi.

Matbuot anjumanida aytib oʻtilganidek, yurtimiz hududidagi Aeroportlar orqali amalga oshirilgan 76 ming 543 ta (xalqaro-56.822 mahalliy 19.721) reyslarda 12 mln 062.745 nafar (xalqaro-9.303.480, mahalliy 2.759.265 yoʻlovchilarning xavfsizligi taʼminlandi. Transport obyektlarida xavfsizlikni taʼminlash va huquqbuzarliklarni barvaqt oldini olish yoʻnalishida targʻibot ishlarida korxonalarda 4344 marotaba, taʼlim muassasalarida 2949 marotaba, mahalla va jamoatchilik oʻrtasida 4664 marotaba jami 11957 marotaba profilaktik suhbat va uchrashuvlar oʻtkazildi.

Ayni vaqtda mamlakatmizda transport va turizm obyektlarida xavfsizlikni taʼminlash yoʻnalishida olib borilayotgan ishlar haqida batafsil maʼlumotga ega boʻlgan jurnalist va blogerlar oʻzlarini qiziqtirgan savollarga ham javob olishdi.