Toshkent shahar IIBB Jamoatchilik kengashi aʼzolari poytaxt IIBB Huquqbuzarliklar profilaktikasi boshqarmasi Voyaga yetmaganlarga ijtimoiy-huquqiy yordam koʻrsatish markazi faoliyati bilan yaqindan tanishdi
2025-09-17 12:20:00 / Yangiliklar
Tadbirda Markaz faoliyati, tarbiyalanuvchilar uchun yaratilgan sharoit va amalga oshirilayotgan loyihalar haqida maʼlumotlar berildi. Markaz bir vaqtning oʻzida 110 nafar voyaga yetmaganlarni qabul qilish imkoniga ega. Mazkur dargohga 3 yoshdan 18 yoshgacha boʻlgan voyaga yetmagan: qarovsiz, adashgan, bedarak yoʻqolgan, ijtimoiy va boshqa xavf ostida qolgan, yashash joyidan oʻzboshimchalik bilan chiqib ketib nazoratsiz yurgan, ijtimoiy-huquqiy yordamga muhtoj, davlat taʼlim-tarbiya muassasalariga, mehribonlik uylariga va boshqa davlat taʼlim dargohlariga joylashtirilishi lozim boʻlgan, shuningdek, qonunda nazarda tutilgan boshqa holatlar toifasiga kiruvchi voyaga yetmagan oʻgʻil-qizlar joylashtiriladi. Ular mazkur dargohda 30 kun, ayrim hollarda 45 kun boʻladi. Bu muddat ichida toʻrt mahal issiq ovqat, yoshi, jinsiga qarab shaxsiy gigiyena vositalari, kiyim-bosh hamda tegishli oʻquv qurollari bilan toʻliq taʼminlanadi.
Shuningdek, voyaga yetmaganlarning hayoti va sogʻligʻini himoyalash, ijtimoiy jihatdan xavf solgan muhitdan chiqarish, ijtimoiy-huquqiy, tibbiy-pedagogik yordam koʻrsatish, huquq va qonuniy manfaatlarini himoya qilish, shaxsi aniqlanmaganlarning shaxsini aniqlash, pedagogik- psixologik, maishiy va tibbiy yordam koʻrsatish choralari koʻrilib, tarbiyaviy, madaniy-maʼrifiy, sport-sogʻlomlashtirish, kasb-hunarga yoʻnaltirish ishlari amalga oshiriladi. Shu bilan birga ilgarigi hayot tarzi, ijtimoiy ahvoli, Markazga kelib tushish sabablari, huquqbuzarlik va jinoyat sodir etishga moyillik darajasi yoki bolaning oʻzi huquqbuzarlik va jinoyat jabrlanuvchisi boʻlgan-boʻlmaganligi hamda bunga sabab boʻlgan holatlar oʻrganiladi.
Markazga joylashtirilgan har bir voyaga yetmaganlar haqida 24 soat ichida tuman prokuraturasi va bolalar masalalari boʻyicha milliy komissiyaga maʼlumot taqdim etilib, har bir qabul qilingan bolalarga shaxsiy yigʻmajildlar yuritiladi. Bu yigʻmajildlar bolalarning keyingi tarbiyasi hamda voyaga yetish jarayonida ular bilan shugʻullanish, kasbga, hayotga toʻgʻri yoʻnaltirishda muhim rol oʻynaydi.
Markazda bolalarning sogʻlom, ruhiy va jismonan baquvvat boʻlishi uchun turli muolaja, dam olish va bilim olishlari uchun maxsus toʻgaraklar faoliyat olib boradi. Markazda qum terapiya, karaoke, kutubxona, Art terapiya, sport, duradgorlik, tikuvchilik, shaxmat-shashka, IT va kompyuter savodxonligi kabi xonalar mavjud. Shuningdek, “Milliylikka asoslangan burchak (choyxona)”, “Hayvonot burchagi”, “Yozgi suv havzasi”, “Yozgi kinoteatr”, “Bolalar oʻyin maydonchasi” “Bolalar sport maydonchasi (vorkaut)”, voleybol, basketbol, futbol maydonlari joylashgan. Xulosa qilib aytganda, Markazda taqdir taqozosi bilan ushbu dargohga keltirilgan bolalar oʻz tengdoshlaridan kam boʻlmagan sharoit va munosabatlarda, baxtli bolalik tuygʻusini yoʻqotmagan holda kamolga topishi uchun barcha imkoniyatlar ishga solingan.
Jamoatchilik kengashi aʼzolari tomonidan markaz faoliyatini yanada takomillashtirish, tarbiyalanuvchi bolalarni keyingi taqdirini kuzatishda yuzaga kelayotgan muammolarni oʻrganish va bartaraf etish choralarini koʻrish masalasida takliflar ishlab chiqish lozimligi belgilandi.
Toshkent shahar IIBB Axborot xizmati