Ogʻir jinoyatlarni sodir etganlikda ayblanib, Interpol kanallari orqali qidiruvda boʻlgan shaxslar xorijiy mamlakatlardan Oʻzbekistonga keltirildi
2025-09-09 18:00:00 / Yangiliklar
Zoʻrlash jinoyatini sodir etgani uchun Interpol orqali xalqaro qidiruvda boʻlgan fuqaro Polshadan Oʻzbekistonga ekstraditsiya qilindi.
U Polsha hududida qoʻlga olingach va zarur tartib talablari amalga oshirilgach, keyinchalik jinoiy javobgarlikka tortish maqsadida Interpolning Oʻzbekiston Respublikasidagi Milliy Markaziy Byurosi xodimlariga topshirildi.
Shu bilan birga, turli ommaviy axborot vositalarida xabar qilinganidek, Amerika Qoʻshma Shtatlaridan Oʻzbekiston Respublikasiga noqonuniy migratsiyaga qarshi kurashish tadbirlari doirasida mamlakatda noqonuniy ravishda boʻlgan 39 nafar fuqaro deportatsiya qilindi. Ular orasida Interpol kanallari orqali oʻta yirik miqdordagi firibgarlik uchun qidiruvda boʻlgan jinoyatchi ham bor edi.
Bu AQSHning Oʻzbekistondagi elchixonasi va Interpolning Oʻzbekiston Respublikasidagi Milliy markaziy byurosi oʻrtasida doimiy axborot almashinuvi va yaqin hamkorlik asosida AQSH immigratsiya xizmatlari eʼtiboriga tushgan xalqaro qidiruvdagi jinoyatchilarning qoʻlga olinganining ikkinchi ijobiy misolidir.
Jinoyatchilar Islom Karimov nomidagi Toshkent xalqaro aeroportiga yetib kelgach, huquqni muhofaza qiluvchi organlarga yetkazish va sodir etilgan jinoyatlar uchun javobgarlikka tortish uchun Interpol Milliy markaziy byurosi va Respublika Ichki ishlar organlari xodimlari tomonidan kutib olindi.
Bu faktlar Interpol doirasida uning oʻzaro hamkorlik mexanizmlaridan foydalangan holda xorijiy hamkorlar bilan samarali xalqaro hamkorlikning yana bir namunasi boʻldi.
Oʻzbekiston Respublikasidagi Interpolning Milliy markaziy byurosi