Biz korrupsiyaga qarshimiz. “Bir qoʻllab yuborsangiz...”
2025-09-08 04:10:00 / Yangiliklar
Viloyat IIB JXX YHXB 3-safarbarlik guruhi yoʻl-patrul xizmati inspektori, safdor Toʻymurod Hodiyev joriy yilning 31-iyul kuni Gʻijduvon tumanidagi “Sarmijon” YPX maskanida xizmat olib borayotgan edi. Tungi soat taxminan 03:30 lar atrofida “Cobalt” rusumli avtomashina yoʻl-patrul maskanidan oʻtayotganda haydovchining koʻz qarashlari inspektorni hushyor torttirdi. Shu bois uning hujjatlarini tekshirish maqsadida avtomashinani toʻxtatdi. Haydovchi oʻzini Xorazm viloyati Qoʻshkoʻpir tumanida yashovchi Yu.Diyorbek (ismi oʻzgartirildi) deb tanishtirdi. Soʻng u dangal maqsadga koʻchdi:
— Aka, shoshganda hujjatlar esdan chiqib qolibdi. Bir safar qoʻllab yuboring, xizmatingizni unutmaymiz.
— Boʻlmaydi. Yaxshisi, avtomashinani jarima maydoniga joylashtiramiz, — dedi safdor T. Hodiyev muloyimlik bilan.
Inspektor fuqaro Yu. Diyorbekka yoʻl harakati qoidalari buzilganini tushuntirib, hujjatlarsiz avtomashina boshqargani uchun unga nisbatan elektron maʼmuriy bayonnoma rasmiylashtirdi. Keyin avtomashinani jarima maydoniga joylashtirishga tutindi.
- Yaqinda ham xuddi shu holat boʻyicha tushgandim. Ancha ovora qilishdi. Qolaversa, jarimasi ham koʻp ekan. Bir qoʻllab yuborsangiz, 2 million 500 ming soʻm pul beraman, — deya haydovchi pora taklif qildi. — Evaziga avtomashinani jarima maydonidan chiqarib berasiz va bayonnomani bekor qilasiz.
- Uzr bu ishingiz qonunga zid. Pora bergan ham, pora olgan ham javobgar hisoblanadi, — deya inspektor ogohlantirdi va maslahat berdi. — Yaxshisi, ozgina kutsangiz ertalab boʻladi. Jarimani toʻlab, avtomashinangizni olib ketaverasiz, bexijolat.
- Aka, aytishga oson. Kamida besh kun ovora boʻlaman, — deya qoidabuzar osoyishtalik posbonini ham jinoyatga boshlamoqchi boʻldi. — Hozir 1 million 500 ming soʻm naqd bor. Kechgacha 1 million soʻmni plastik kartangizga oʻtkazib beraman. Yoʻq, demang, aka. Qolaversa, bu yaxshiligingizni sira unutmayman.
YPX inspektorining bir necha bor ogohlantirishiga qaramasdan, qoidabuzar fuqaro maqsadidan qaytmadi. Natijada safdor T. Hodiyev holat yuzasidan rahbariyat nomiga bildirgi bilan murojaat qildi.
Murojaat yuzasidan IIV SHXBB Buxoro viloyati boʻyicha boshqarmasi hamda Departamentning Gʻijduvon tumani boʻlimi xodimlari hamkorligida oʻtkazilgan tezkor tadbirda fuqaro Yu. Diyorbek safdor T. Hodiyevga 1 million 500 ming soʻm pulni pora tariqasida bergan vaqtida ushlandi.
Mazkur holat yuzasidan Jinoyat kodeksining 211-moddasi bilan jinoyat ishi qoʻzgʻatilib, tergov harakatlari olib borilmoqda.
Safdor T. Hodiyev kabi halol, gʻayrat-shijoatli yoshlarimiz bor ekan, yurtimiz tinch-osoyishta, osmonimiz musaffo boʻladi.
Mirzoqul AHADOV, oʻz muxbirimiz.
Buxoro viloyati.