Oʻzbekiston Interpol Milliy Markaziy Byurosi xalqaro qidiruvda boʻlgan jinoyatchini Tailand Qirolligidan chiqarib yuborilishiga erishdi
2025-08-18 14:30:00 / Yangiliklar
Interpol Toshkent va Bangkok Milliy markaziy byurolarining hamkorlikdagi saʼy-harakatlari natijasida Interpol kanallari orqali xalqaro miqyosda qidiruv eʼlon qilingan jinoyatchini deportatsiya qilish masalasi hal etildi.
Poytaxtdagi Islom Karimov nomidagi Xalqaro aeroport hududida Milliy markaziy byuro xodimlari tomonidan Tailand Qirolligidan deportatsiya qilingan Oʻzbekiston fuqarosi X.K. ushlandi. U Oʻzbekiston huquqni muhofaza qilish organlari tashabbusi bilan oʻta yirik miqdordagi firibgarlikda ayblanib, xalqaro qidiruvda boʻlgan. Ushbu holat yuzasidan jinoyat ishi qoʻzgʻatilgan, ayblanuvchi chet elga qochib, tergovdan yashiringan va xalqaro qidiruvga eʼlon qilingan.
Interpol kanallari orqali Tailand huquqni muhofaza qilish organlari bilan muvofiqlashtirilgan hamkorlik harakatlari natijasida, qidiruvdagi shaxs Tailand hududida ushlandi va keyingi tergov tadbirlarini oʻtkazish uchun Oʻzbekiston Respublikasiga deportatsiya qilindi.
Oʻzbekiston Respublikasidagi Interpol Milliy markaziy byurosi