Oʻzbekiston Respublikasidagi Interpolning Milliy markaziy byurosi xalqaro qidiruvda boʻlgan bir nechta jinoyatchilarni mamlakatdan chiqarib yuborish toʻgʻrisida kelishuvga erishdi
2025-08-14 15:45:00 / Yangiliklar
Interpol Toshkent va Anqara Milliy markaziy byurolarining olib borgan muvofiqlashtirish ishlari va yaqin hamkorligi, shuningdek, Amerika Qoʻshma Shtatlarining Oʻzbekiston Respublikasidagi elchixonasi bilan samarali hamkorligi natijasida Interpol kanallari orqali qidiruv eʼlon qilingan jinoyatchilarni deportatsiya qilish masalasi hal etildi.
Oʻzbekiston Respublikasidagi Interpolning Milliy markaziy byurosi axborot koʻmagi va AQSH vakolatli organlari bilan yaqin hamkorlikda, Amerika hamda Turkiya tomonlari bilan qoʻshma saʼy-harakatlar natijasida, turli jinoyatlar, jumladan soliqlarni toʻlashdan boʻyin tovlash, oʻta yirik miqdordagi firibgarlik va boshqa qilmishlarni sodir etganligi uchun huquqni muhofaza qiluvchi organlarimiz tomonidan qidiruv eʼlon qilingan Oʻzbekiston fuqarolari mamlakatdan chiqarib yuborildi.
Amerika tomoni, shuningdek Anqara Interpol Milliy Markaziy Byurosi, AQSH va Turkiya vakolatli organlari bilan olib borilgan muzokaralar, qoʻshma tezkor harakatlar va axborot almashinuvi natijasida qidiruvdagi shaxslarni mamlakat hududidan chiqarib yuborish toʻgʻrisida qaror qabul qilindi.
Shu tariqa AQSHning Immigratsiya va bojxona politsiyasi xodimlari hamrohligida ikki nafar jinoyatchi Nyu-Yorkdan Toshkentdagi Islom Karimov nomidagi Xalqaro aeroportga olib kelindi, yana ikki kishi esa Istanbuldan chiqarib yuborildi. Keyin ular keyingi tergov harakatlarini oʻtkazish maqsadida Interpol Milliy markaziy byurosi va respublika hududiy ichki ishlar organlari xodimlariga topshirildi.
Oʻzbekiston Respublikasidagi Interpolning Milliy markaziy byurosi