Jizzax viloyati mahallalarida xavfsiz muhitni yaratish boʻyicha Ichki ishlar vazirligi tomonidan oʻtkazilgan kompleks inspektorlik tekshiruvining yakunlari sarhisob qilindi
2025-08-03 14:00:00 / Yangiliklar
Xususan, vazirlik ishchi guruhi tomonidan Jizzax viloyatining barcha tuman va shaharlari ichki ishlar boʻlimlarining faoliyati bilan tanishildi. Oʻrganishlar jarayonida asosiy eʼtibor, jinoyatchilikning barvaqt oldini olishga hamda fuqarolar va xodimlar uchun yaratilgan sharoitlarni yaxshilashga qaratildi.
Bu jarayonda barcha yoʻnalishdagi ishlar kompleks oʻrganildi, ish natijadorligini oshirish yuzasidan topshiriq va tavsiyalar berildi.
Shuningdek, besh yil davomida kriminogen vaziyati murakkab boʻlgan barcha mahallalar, shu jumladan “Madaniyat”, “Ulugʻbek” va “Toqchilik” mahallalari hamda chegara hududlaridagi mahallalarga bevosita borilib, “mahalla yettiligi” bilan suhbatlashildi, mavjud muammoli masalalar oʻrganildi va xavfsizlikni taʼminlash uchun qoʻshimcha kuch-vositalar ajratish, xizmatni toʻgʻri tashkil etish, kameralashtirish boʻyicha aniq chora-tadbirlar belgilab olinib, masʼul rahbarlar nomma-nom biriktirildi.
Bundan tashqari, turistik obyektlarida xavfsizlikni taʼminlash masalalari oʻrganilib, muammoli hududlarga qoʻshimcha kuch-vositalarni jalb etish boʻyicha chora tadbirlar belgilab olindi.
Ishchi guruhning oʻrganishlariga koʻra viloyat hududida jinoyatchilikka qarshi kurashish, huquqbuzarliklarning barvaqt oldini olish hamda mahalla jinoyatchiligini jilovlashga qaratilgan tadbirlar natijasida, 2025-yilning 6 oyida viloyatning 213 ta mahallasida bironta ham jinoyat sodir etilishiga yoʻl qoʻyilmagan hamda oldini olish lozim boʻlgan jinoyatlarni ham kamayishiga erishilgan.
Ichki ishlar vazirligi ishchi guruhining Jizzax viloyatidagi kompleks inspektorlik tekshiruvi yakunlariga bagʻishlangan tanqidiy yigʻilish boʻlib oʻtdi.
Unda ichki ishlar vazirligi rahbariyati, viloyat, tuman va shahar ichki ishlar hamda sohaviy xizmatlar rahbarlari va oʻrinbosarlari ishtirok etishdi.
Yigʻilishda ichki ishlar organlari xizmatining joriy holati, faoliyat samaradorligi, shaxsiy tarkibning kasbiy tayyorgarligi, xizmat intizomi va jamoat xavfsizligini taʼminlash borasidagi ishlar toʻliq tahlil qilindi va aniq vazifalar belgilab olindi.
Tadbir jarayonida xizmat faoliyatida yuqori natijalarga erishgan, aholi hamda safdoshlari tomonidan alohida eʼtirof etilgan rahbar xodimlar Ichki ishlar vazirining buyrugʻi bilan munosib ragʻbatlantirildi.
Jumladan, Jizzax viloyati ichki ishlar boshqarmasi jamoat xavfsizligi xizmati boshligʻi oʻrinbosari – probatsiya boʻlimi boshligʻi kapitan Jasur Aliqulovga muddatidan oldin “mayor” maxsus unvoni berildi.
Shuningdek, Jizzax viloyati ichki ishlar boshqarmasi axborot texnologiyalari sohasidagi jinoyatlarga qarshi kurashish boshqarmasi boshligʻi podpolkovnik Sherzod Qosimov Ichki ishlar vazirligining “Faxriy yorligʻi” bilan, Zomin tumani ichki ishlar boshqarmasi 1-son ichki ishlar boʻlimi profilaktika katta inspektori podpolkovnik Alisher Almatov I darajali “Ichki ishlar organlarida benuqson xizmatlari uchun” koʻkrak nishoni bilan, Mirzachoʻl tumani ichki ishlar boʻlimi kanselyariya boshligʻi safdor Farrux Ergashov Ichki ishlar vazirligining “Aʼlo xizmatlari uchun” koʻkrak nishoni bilan, Gʻallaorol tumani ichki ishlar boʻlimi tergovchisi katta leytenant Doston Abdurasulov Ichki ishlar vazirligining esdalik qoʻl soati bilan hamda Zarbdor tumani ichki ishlar boʻlimi profilaktika katta inspektori katta leytenant Sarvarjon Boʻronov pul mukofoti bilan taqdirlandilar.
Shuningdek, faoliyati davomida jiddiy kamchiliklarga yoʻl qoʻygan bir guruh rahbar va xodimlarga nisbatan intizomiy taʼsir choralari koʻrildi.
Jumladan, viloyat IIB JXD Yoʻl harakati xavfsizligi boshqarmasi boshligʻining birinchi oʻrinbosari egallab turgan lavozimidan ozod etildi, viloyat IIB boshligʻi oʻrinbosari – Jamoat xavfsizligi xizmati boshligʻiga “Hayfsan” intizomiy jazosi eʼlon qilindi, shuningdek, Jizzax shahar va Sharof Rashidov tumani IIB boshligʻi va barcha oʻrinbosarlarining faoliyatiga 9 oy yakuni boʻyicha baho berilishi belgilandi.
Inspektorlik tekshiruvi natijalariga koʻra, viloyat hamda tuman-shahar boʻlinmalariga xizmatda foydalanish uchun turli rusumdagi 25 dona avtotransport vositalari taqdim etildi, qoʻshimcha tarzda maxsus texnik vositalar, kompyuter jamlanmalari, formali kiyim boshlar ajratilishi taʼkidlandi.
Yigʻilish davomida masʼul rahbarlarning axborotlari tinglandi, takliflar koʻrib chiqildi va aniqlangan kamchiliklarni bartaraf etish boʻyicha chora-tadbirlar belgilab olindi.