Namangan viloyati Kosonsoy tumanining "Namuna" mahallasida "Sayxunobod tajribasi"ni ommalashtirish yuzasidan oʻquv-seminar tashkil etildi
2024-03-16 08:00:00 / Yangiliklar
Kuni kecha davlatimiz rahbari raisligida Sirdaryo viloyatining Sayxunobod tumanida tomorqa va uy xoʻjaliklaridagi imkoniyatlarni toʻliq ishga solish orqali aholi daromadlarini oshirish yuzasidan oʻtkazilgan videoselektor yigʻilishida Sayxunobod tajribasini butun Respublikada ommalashtirish boʻyicha bir qator topshiriqlar berildi.
Shu munosabat bilan Namangan viloyati IIB boshligʻi polkovnik Shuxrat Aliyev Kosonsoy tumanining «Namuna» mahallasida Sayxunobod tajribasini joriy etish yuzasidan tashkil etilgan oʻquv-seminarda ishtirok etib, dastlab, tuman sektor rahbarlari, «Agrobank», «Xalq banki», «Mikrokreditbank», «Turon bank» tuman filiallari boshqaruvchilari, tadbirkorlar va ijtimoiy-iqtisodiy soha vakillari bilan yaqindan suhbatlashdi.
Uchrashuv davomida aholini tomorqa va uy xoʻjaligidagi imkoniyatlaridan toʻliq foydalanishga jalb etish maqsadida parrandachilik, quyonchilik, asalarichilik ortidan oilaviy daromadini oshirayotgan fuqarolarning tajribalari koʻrgazma tariqasida namoyish etildi.
Shuningdek, yer unumdorligini oshirish maqsadida tomorqa ishlarida keng foydalanishga moʻljallangan moto-kultivatorlarning texnik imkoniyatlari bilan ham tanishildi.
Yigʻilish soʻnggida tumandagi 59 ta mahallaga biriktirilgan masʼullarga aholini tomorqalardan unumli foydalanishlari uchun yetarlicha shart-sharoit yaratish, uy sharoitida chorvachilik, asalarichilik, parrandachilik va oila uchun boshqa qoʻshimcha daromad keltiruvchi ishlar bilan shugʻullanishga jalb qilish va ularni oilaviy tadbirkorlikka qiziqtirish va koʻmaklashish maqsadida kooperatsiyalar tashkil etish hamda turli masalalar yuzasidan aniq vazifalar belgilab berildi.
Namangan viloyati IIB Axborot xizmati