Toshkent shahar IIBB boshligʻi 3-sektor faoliyatini oʻrgandi
2024-03-13 09:00:00 / Yangiliklar
“Oʻzbekiston – 2030" strategiyasini “Yoshlar va biznesni qoʻllab-quvvatlash yili”da amalga oshirishga oid davlat dasturi toʻgʻrisida”gi Prezident Farmoniga koʻra, alohida ishlash talab etiladigan, shuningdek, isteʼdodli va iqtidorli yoshlar “Yoshlar balansi” asosida vazirlik va idoralar, mahalliy ijro etuvchi hokimiyat organlari, korxona va tashkilotlar rahbarlariga biriktirildi.
Toshkent shahridagi 3-sektorda istiqomat qiluvchi yoshlarga Toshkent shahar IIBB va hududiy IIO FMB rahbariyati masʼul etib biriktirilgan.
Poytaxt IIBB boshligʻi general-mayor Aziz Tashpulatov Mirzo Ulugʻbek tumani 3-sektor faoliyatini oʻrgandi. Oʻrganish jarayonida hududda istiqomat qiluvchi yoshlarni xatlovdan oʻtkazish, ular bilan ishlash mexanizmi masʼullar ishtirokida muhokama qilindi. Aniqlangan kamchiliklarni bartaraf etish yuzasidan tegishli mutasaddilarga topshiriqlar berildi.
Xususan, har bir yoshni bandligini taʼminlash, boʻsh vaqtini mazmunli tashkil etish, taʼlim olishi va ish bilan taʼminlanishi uchun tumanda barcha sharoitlar yaratilishi lozimligi alohida taʼkidlandi.
Yoshlar bilan ishlashda mahalla yettiligi, Yoshlar ishlari agentligi, “Ishga marhamat” monomarkazi va boshqa tashkilotlar bilan yaqindan hamkorlik qilish lozimligi tushuntirildi.
Bu kabi oʻrganishlar barcha tumanlarda davom etmoqda.
Toshkent shahar IIBB Axborot xizmati