Oʻzbekistonda ilk bor voleybol boʻyicha U-19 yoshgacha boʻlgan yoshlar oʻrtasida Jahon chempionati bahslari boshlandi
2025-07-24 22:00:00 / Yangiliklar
Avval xabar qilinganidek, mamlakatimizda voleybol boʻyicha 19 yoshgacha boʻlgan yigitlar oʻrtasidagi Jahon chempionati ilk bor oʻtkazilmoqda. Mazkur nufuzli musobaqada 24 ta davlatdan 288 nafar yosh voleybolchi qatnashmoqda.
Chempionat doirasida bahslarni adolatli va yuqori saviyada tashkil etish maqsadida 56 nafar xalqaro va 50 nafar mahalliy hakamlar, shuningdek, 80 nafar texnik mutaxassis jalb etilgan. Musobaqada ishtirok etuvchi jamoalar 4 guruhga boʻlingan holda chempionlik uchun kurash olib borishmoqda.
Bugun, 24-iyul kuni, chempionatning tantanali ochilish marosimi boʻlib oʻtdi. Unda musobaqa ishtirokchilari, tashkilotchilar va sport muxlislari ishtirok etishdi.
Ochilish marosimidan soʻng, Oʻzbekiston va Turkiya milliy terma jamoalari oʻrtasida dastlabki uchrashuv boʻlib oʻtdi.
Oʻzbekiston yoshlar terma jamoasi ushbu uchrashuvda Turkiya jamoasi ustidan 3:0 hisobida ishonchli gʻalabaga erishdi.
Yurtdoshlarimizning mazkur zafarli natijasi, ularning yuqori sport mahorati, jismoniy tayyorgarligi va gʻalabaga boʻlgan irodasini yaqqol namoyon etdi.
Uchrashuvdan soʻng, Oʻzbekiston terma jamoasi aʼzolari bu gʻalabani nafaqat oʻz jamoasiga, balki butun xalqimizga, Vatanimizga bagʻishlashlarini taʼkidlashdi.