Oʻzbekiston Respublikasi IIV Qorovul qoʻshinlari qoʻmondonligida Qorovul qoʻshinlari tashkil topganligining 25-yilligiga bagʻishlangan tantanali tadbir boʻlib oʻtdi
2024-03-04 13:00:00 / Yangiliklar
Oʻzbekiston Respublikasi Vazirlar Mahkamasining 1999-yil 4-martdagi 99-19-son qaroriga asosan Ichki ishlar vazirligi Qorovul qoʻshinlari tashkil etilgan.
Ushbu qarorga asosan qabul qilingan Ichki ishlar vazirining 2023-yil 12-dekabrdagi "4-mart Qorovul qoʻshinlari tashkil topganligining yigirma besh yilligiga tayyorgarlik koʻrish va oʻtkazish toʻgʻrisida”gi 710-son buyrugʻi ijrosini taʼminlash maqsadida, joriy yilning 4-mart kuni Oʻzbekiston Respublikasi IIV Qorovul qoʻshinlari qoʻmondonligida Qorovul qoʻshinlari tashkil topganligining 25-yilligiga bagʻishlangan tantanali tadbir boʻlib oʻtdi.
Tantanali tadbirda Ichki ishlar vaziri oʻrinbosari general-mayor B.Yu.Mirzaraximov ishtirok etib, sana munosabati bilan Ichki ishlar Vazirining tabrigini oʻqib eshittirdi.
Tadbirda Vazir oʻrinbosari general-mayor B.Yu.Mirzaraximov harbiy xizmatchilarga yuklatilgan jangovar xizmat vazifalarini vijdonan bajarishlari, milliy armiyamizni yanada rivojlantirish va mamlakatimiz mudofaa qobiliyatini mustahkamlashda Prezidentimiz taʼbiri bilan aytganda “Bugungi kunda har birimiz amalda Vatan himoyachisi boʻlishimiz, yoshlarimizni ham shu ruhda kamol toptirishimiz zarur” deya taʼkidlab, bayram munosabati bilan shaxsiy tarkibni tabrikladi.
Shuningdek, tadbirda 70 nafar harbiy xizmatchilar, 2 nafar Qoʻshin faxriylari Ichki ishlar vazirining buyrugʻi bilan ragʻbatlantirilib, mukofotlar harbiy xizmatchilar va Faxriylarga tantanali ravishda topshirildi.
IIV Transport va turizm obyektlarida xavfsizlikni taʼminlash departamenti Axborot guruhi