Kuni kecha Indoneziya davlatining Semarang shahrida Osiyo politsiya taʼlim muassasalari assotsiatsiyasi (APTA) Bosh assambleyasining navbatdagi yigʻilishi boʻlib oʻtdi
2025-07-16 13:35:00 / Yangiliklar
Unda Indoneziya, Janubiy Koreya, Malayziya, Tailand, Moʻgʻuliston, Avstraliya, Filippin, Oʻzbekiston va boshqa davlatlar huquqni muhofaza qiluvchi organlarining taʼlim muassasalari rahbarlari, shu jumladan, IIV akademiyasi boshligʻi R. Xatamov ishtirok etdi.
Hozirgi integratsiyalashuv sharoitida hamkorlikni mustahkamlash, tashkilotga yangi aʼzolarni qabul qilish, taʼlim muassasalari oʻrtasida tajriba almashinuvini kengaytirish, politsiya kadrlarining zamonaviy tahdid va xatarlarga qarshi kurashish salohiyatini oshirish yigʻilishning asosiy maqsadi boʻldi.
Yigʻilish ochilishida assotsiatsiya vitse-prezidenti P. M. Yung soʻz olib, hamkorlikning bugungi holatida erishilayotgan natijalar, kelgusidagi ustuvor vazifalar, global xavfsizlik va barqarorlik masalalarida yuzaga kelayotgan dolzarb muammolarga eʼtibor qaratdi.
Shuningdek yigʻilishda Indoneziya milliy politsiya akademiyasi, Moʻgʻuliston ichki ishlar universiteti, Tailand qirollik politsiya akademiyasi, Nepal milliy politsiya akademiyasi, Koreya politsiya xodimlarini rivojlantirish instituti, Vyetnam xalq politsiya akademiyasi rahbarlari, APTA, ASEANAPOL tashkilotlari vakillari soʻzga chiqdi.
IIV akademiyasi boshligʻi R. Xatamov global tahdid va xatarlar sharoitida hamkorlikning yangi formatlarini ishlab chiqish, taʼlim dasturlarini rivojlantirish dolzarb ahamiyat kasb etayotganini taʼkidlab, Osiyo politsiya taʼlim muassasalari assotsiatsiyasining samarali faoliyatini alohida eʼtirof etdi. Shu yerning oʻzida mehmonlarga IIV akademiyasi faoliyatiga oid videorolik namoyish qilindi. Aytish joizki, oʻquv dargohida yoʻlga qoʻyilgan zamonaviy taʼlim jarayonlari, oʻqitishning ilgʻor yondashuvlari, akademiyaning zamonaviy qiyofasi va infratuzilmasi xorijiy delegatsiyalar vakillari tomonidan alohida eʼtirof etildi.
Yigʻilishda assotsiatsiyaning ayrim hujjatlariga qoʻshimcha va oʻzgartirishlar kiritish, tashkilot huzurida tuzilmalar taʼsis etish, tashkilotga yangi aʼzolarni qabul qilish va boshqa masalalar atroflicha muhokama qilindi. Shunga koʻra, IIV akademiyasi oʻttiz birinchi aʼzo sifatida assotsiatsiyaga qabul qilindi. Joriy yilda Indoneziya milliy politsiya akademiyasida taʼlim muassasalari oʻrtasida talabalar festivalini tashkil etish, kelgusi yil iyun oyida Moʻgʻuliston ichki ishlar universitetida APTA Bosh assambleyasining navbatdagi yigʻilishini oʻtkazishga kelishib olindi.
Yigʻilish doirasida Indoneziya milliy politsiya akademiyasida huquqni muhofaza qilish organlari faoliyatiga raqamli texnologiyalarni transformatsiya qilishning dolzarb masalalariga bagʻishlangan xalqaro konferensiya ham boʻlib oʻtdi. Yigirmadan ortiq taʼlim muassasalari vakillari qatnashgan anjumanda raqamli texnologiyalar yordamida huquqni qoʻllash amaliyotini takomillashtirishning zamonaviy imkoniyatlari va istiqbollari yuzasidan fikr almashildi.
Bundan tashqari, Osiyo politsiya taʼlim muassasalari assotsiatsiyasi yigʻilishiga taklif qilingan mehmonlar Indoneziya milliy politsiya akademiyasi kursantlarining bitiruv marosimida qatnashib, oʻquv muassasasi faoliyati bilan tanishdi.
IIV akademiyasi Axborot xizmati