Oʻzbekiston va Polsha Interpol xodimlarining hamkorlikdagi saʼy-harakatlari tufayli yirik miqdordagi firibgarlik uchun qidiruvda boʻlgan jinoyatchi ushlandi va ekstraditsiya qilindi
2025-06-29 01:05:00 / Yangiliklar
Interpolning Oʻzbekiston Respublikasidagi Milliy markaziy byurosi xodimlari tomonidan firibgarlik jinoyatini sodir etganligi uchun xalqaro qidiruvda boʻlgan jinoyatchini ekstraditsiya qilish jarayoni amalga oshirildi.
Interpolning Toshkent va Varshava Milliy markaziy byurolarining oʻzaro hamjihatlikdagi hamkorligi tufayli Polshada Interpolning Qizil xabarnomasi figuranti sifatida hibsga olingan, huquqni muhofaza qiluvchi organlarimiz tomonidan firibgarlik uchun qidirilayotgan jinoyatchi Oʻzbekiston Respublikasiga topshirildi.
Olingan maʼlumotlarga koʻra, jinoyatchi Yevropa Ittifoqi mamlakatlari hududida yashiringan, shu sababli tezkor-qidiruv tadbirlari davomida u Polsha hududida aniqlangan va qoʻlga olingan.
Toshkent va Varshava Interpol MMBning birgalikdagi harakatlari natijasida qidiruvdagi shaxs aniqlanib, qoʻlga olingan.
Oʻzbekiston Respublikasi Bosh prokuraturasining ekstraditsiya qilish toʻgʻrisidagi iltimosnomasi qanoatlantirilgandan soʻng, Interpol xodimlari hamrohligida va Oʻzbekiston Respublikasining Polsha Respublikasidagi diplomatik vakolatxonasi vakillari koʻmagida jinoyatchi sud oldida javob berish uchun Oʻzbekistonga olib kelindi.
Oʻzbekiston Respublikasidagi Interpolning Milliy markaziy byurosi