O‘zbеkiston Rеspublikаsi Ichki ishlаr vаzirligi

Oʻzbekiston Respublikasi IIV Jamoat xavfsizligi departamenti Huquqbuzarliklar profilaktikasi xizmati boshligʻi polkovnik B.E.Berdialiyev, Surxondaryo viloyat IIB boshligʻi polkovnik T.K.Ismailov hamda viloyatdagi idora va tashkilot masʼullari ishtirokida vohadagi ijtimoiy profilaktika yoʻnalishida amalga oshirilayotgan ishlar samaradorligini oʻrganildi. Dastlab, Termiz shahrining “Guliston” hamda “Doʻstlik” mahallalarida joylashgan tayanch punktlariga tashrif buyurildi. Huquqbuzarliklar profilaktikasi xizmati boshligʻi B.E.Berdialiyev tomonidan profilaktika inspektori va mahallaga biriktirilgan “mahalla yettiligi” faoliyati, ularga biriktirilgan yoshlar roʻyxati, ijtimoiy profilaktika yoʻnalishi boʻyicha berilgan xulosalar holati koʻzdan kechirildi. Shu bilan birgalikda bahor mavsumi yaqinlashib kelayotganligi munosabati bilan shahar hududini obodonlashtirish, mahalla hududlarida aholi bilan hashar ishlarini olib borish va bir qator sohani rivojlantirishga qaratilgan vazifalar ham belgilab berildi.

Keyingi manzil Angor tumanining “Yangi turmush” mahallasida joylashgan 3-sonli huquq-tartibot maskani hamda “Novshahar” mahallasida joylashgan 47-sonli tayanch punkti boʻldi. Asosan, mahalla hududida yoshlar bilan ishlash dasturini yanada jadallashtirish, hududda jamlangan uyushmagan yoshlarga xulosalar berish orqali ularni birlashtirish, toʻgʻri yoʻlga qaytarish hamda yoshlarning muammolarini alohida oʻrganish, profilaktika inspektorining faoliyati davomida tuman hokimi bilan jinoyatchilikni oldini olish borasida hisobot uchrashuvlarida mahalla yettiligi rahbarlari qatnashishi, shu orqali aholi orasiga kirib borish haqida koʻrsatmalar berildi.

Xuddi shunday Muzrabot tumanidagi “Yangi hayot” va “Yoʻlchi” mahallalaridagi tayanch punktlarida jinoyatchilikka qarshi kurashish, huquqbuzarliklarning oldini olishga qaratilgan ishlarning tahlili koʻrib chiqildi. Hududda mavjud boʻlgan mingga yaqin yoshlarning masʼullarga biriktirilganligi nazorati, uyma-uy yurish tartibini yanada jadallashtirish borasida bir qator vazifalar yuklandi.

Shu bilan birgalikda, tumanining “Yoʻlchi” mahallasida oʻzining ish faoliyatini olib borayotgan mahalla profilaktika inspektori Q.Moʻminov mahallada keng koʻlamli oʻzgarishlarni amalga oshirib kelayotganligi sababli Viloyat IIB rahbariyati tomonidan ragʻbatlantirish choralari koʻrilishi belgilandi.

Shoʻrchi tumanida ham uyushmagan yoshlarga nemis, ingliz va rus tillarini oʻrgatish markazi, tibbiyot birlashmasiga qarashli Shoʻrchi hamda Oltinsoy tumanlariga xizmat koʻrsatuvchi 10 oʻrinli Narkologiya dispanseri faoliyati bilan yaqindan tanishilib, ushbu maskanda aniqlangan muammo va kamchilliklarni bartaraf etish yuzasidan tegishli koʻrsatma va topshiriqlar berildi.

“Navroʻz” mahallasida joylashgan tibbiyot birlashmasiga qarashli mast holatdagi bemorlarni vaqtincha qabul qilish boʻlimi sharoitlari hamda ish faoliyatini olib borish sifati ham ishchi guruh vakillari tomonidan koʻzdan kechirildi. Ushbu boʻlimning asosiy vazifasi spirtli ichimlik ichgan fuqarolarning barchasiga xizmat koʻrsatadi. Boʻlim 13 kishiga moʻljallangan boʻlib, ayollar, erkaklar va chet el fuqarolari uchun maxsus xonalar ajratilgan. Boʻlimga faqatgina Oltinsoy va Shoʻrchi tumanlari maxsus toifadagi fuqarolar qabul qilinishi koʻrsatib oʻtilgan.

Denov tumanidagi “Namozgox” mahallasida ham aholi tinchligini saqlash, xavfsizlikni taʼminlash choralari koʻrilgan boʻlib, profilaktika inspektori mahalla faollari bilan hamkorlikda samarali faoliyat olib borayotgani natijasida hududda birorta ham jinoyat sodir etilmagan. Oʻrganish jarayonida mazkur mahalladagi profilaktik ishlar bilan ham yaqindan tanishilar ekan, mahalla raisi va xotin qizlar bilan ishlash boʻyicha mutaxassisiga besh million soʻmdan, mahalla profilaktika inspektoriga 1 dona kompyuter jamlanmasi hamda mahalla yoshlari uchun 500 ta kitob jamlanmasi ragʻbatlantirish tariqasida berildi.

“Quyoshli yurt” mahallasida joylashgan “Monomarkaz” ham eʼtibordan chetda qolmadi. U yerda nemis tilini oʻrganayotgan yoshlar bilan suhbat oʻtkazildi. Shundan soʻng, polkovnik B.E.Berdialiyev hududdagi “Ozod” mahallasida joylashgan Alkogolli mastlik holatida boʻlgan shaxslarga tibbiy yordam koʻrsatish punkti faoliyati va undagi sharoitlar bilan tanishib, u yerdagi spirtli ichimlikka ruju qoʻygan shaxslar bilan profilaktik suhbat oʻtkazdi. Tibbiyot xodimlari va biriktirilgan masʼullarga esa tegishli koʻrsatmalar berib oʻtdi.

Oʻrganishlar davomida Denov tumanida jinoyatga yoʻl qoʻymagan mahalla faollari alohida ragʻbatlantirildi.

Navbatdagi manzil Oltinsoy tumani boʻldi. IIV JXD huquqbuzarliklar profilaktika boshligʻi polkovnik B.E.Berdialiyev tumandagi “Xalqobod” mahallasi yettiligi bilan uchrashib, ular bilan ijtimoiy profilaktika jarayonlari boʻyicha suhbat oʻtkazdi. “Xalqobod” mahallasida xizmat olib borayotgan profilaktika inspektori katta leytenant Sh.S.Ziyoyevning xizmat xonasidagi shart-sharoitlar bilan tanishib, profilaktika inspektoriga huquqbuzarliklar profilaktikasi yoʻnalishi boʻyicha profilaktika inspektorlarining vaqtlarini tejash maqsadida hozirgi kunda amalga oshirilgan elektron tizimlar haqida tushuncha berdi.

Surxondaryo viloyati IIB Axborot xizmati