Ichki ishlar vazirligi huzuridagi Jamoatchilik kengashining hisobot yigʻilishi boʻlib oʻtdi
2025-06-23 16:50:00 / Yangiliklar
Mamlakatimizda fuqarolar bilan ochiq va samarali muloqotni yoʻlga qoʻyish, ularning huquq va manfaatlarini himoya qilish masalasi davlatimiz siyosatida ustuvor vazifalardan biri sifatida belgilangan.
Ayniqsa, ichki ishlar organlari faoliyatida jamoatchilik kengashlari nafaqat nazoratchi, balki konstruktiv takliflar beruvchi, inson huquq va erkinliklarini taʼminlashda muhim hamkor sifatida oʻzini namoyon etmoqda.
Aytish joizki, bugungi kunda Ichki ishlar vazirligi huzuridagi Jamoatchilik kengashida 29 nafar jamiyatimizning ziyolilari va jamoatchilik faollari ishtirok etmoqdalar. Ular orasida taniqli huquqshunoslar, jurnalistlar, fuqarolik jamiyati faollari, yoshlar vakillari ham bor. Bu tarkib kengash faoliyatining koʻp qirraliligini taʼminlab, qarorlarni qabul qilish jarayonida turli ijtimoiy qatlamlar manfaatlarini inobatga olishga imkon bermoqda.
Tadbirda Ichki ishlar vazirligi rahbariyati, Jamoatchilik kengashi aʼzolari, vazirlik sohaviy xizmat rahbarlari hamda ommaviy axborot vositalari vakillari ishtirok etdilar.
Tadbirni Ichki ishlar vazirligi jamoatchilik kengashi raisi Yodgor Saʼdiyev ochib berdi hamda kengashning yangilangan tarkibi bilan yigʻilganlarni tanishtirdi.
Shundan soʻng, Ichki ishlar vaziri general-mayor Aziz Tashpoʻlatovning hisoboti tinglandi. Unda ichki ishlar organlari faoliyatida ochiqlik va shaffoflikni taʼminlash hamda tizimning imijini oshirish borasida bajarilayotgan ishlar, aholining murojaatlari bilan ishlash jarayonlari, sohada korrupsiyaga qarshi olib borilayotgan islohotlar haqida toʻxtalib oʻtildi.
Ushbu jarayonda xizmatlarni raqamlashtirish, xodimlarning huquqiy savodxonligini oshirish hamda nazorat va hisobdorlik mexanizmlarini kuchaytirish yoʻnalishlarining samaradorligini oshirish, mavjud muammo va kamchiliklarni aniqlab bartaraf etish mexanizmlari ishlab chiqilayotganligi taʼkidlandi.
Tadbir davomida IIV Axborot xizmati faoliyati haqida hisobot videoroligi namoyish etildi.
Shuningdek, yigʻilishda Kengash aʼzolari soʻzga chiqib, ichki ishlar organlari faoliyatini barqaror rivojlantirish, aholi murojaatlari va eʼtirozlarini oʻz vaqtida hal etish orqali tizim imijini oshirish borasida taklif va mulohazalarini bildirib oʻtdilar.
Kelgusida uzviy hamkorlikni davom ettirish, mavjud muammolarni bartaraf etish boʻyicha bajarilishi lozim boʻlgan muhim vazifalar belgilab olindi.
Tadbir soʻngida ichki ishlar organlari faoliyatida ochiqlik va shaffoflikni taʼminlash hamda taʼsirchan jamoatchilik nazoratini oʻrnatish borasidagi samarali mehnati hamda “27-iyun — Matbuot va ommaviy axborot vositalari xodimlari kuni” munosabati bilan Jamoatchilik kengashining alohida faol aʼzolariga Ichki ishlar vazirligi nomidan tashakkur eʼlon qilindi.