Oʻzbekiston Respublikasi IIV delegatsiyasi Qozogʻiston Respublika Ostona shahrida MDH davlatlari IIV tezkor xizmatlari rahbarlarining yigʻilishida ishtirok etdi
2025-06-17 19:00:00 / Yangiliklar
Ostona shahrida Mustaqil Davlatlar Hamdoʻstligiga aʼzo davlatlar ichki ishlar vazirliklari tezkor xizmatlari rahbarlarining uyushgan jinoyatchilikka qarshi kurashish masalalariga bagʻishlangan yigʻilishi oʻtkazildi.
Tadbirda Ozarbayjon, Armaniston, Belarus, Qozogʻiston, Qirgʻiziston, Rossiya, Tojikiston, Oʻzbekiston Respublikalari ichki ishlar vazirliklari delegatsiyalari, shuningdek MDHga aʼzo davlatlar hududida uyushgan jinoyatchilik va boshqa xavfli jinoyat turlariga qarshi kurashni muvofiqlashtirish byurosi vakillari ishtirok etdilar.
Oʻzbekiston Respublikasi delegatsiyasiga Ichki ishlar vazirining birinchi oʻrinbosari, polkovnik Ayubxon Raxmatullayev rahbarlik qildi.
Yigʻilishda Uyushgan jinoyatchilik va boshqa xavfli jinoyatlarga qarshi kurashni muvofiqlashtirish Byurosi direktori, politsiya general-leytenanti Oleg Konovalov va MDH davlatlari ichki ishlar vazirliklari vakillari maʼruza qildilar.
Uchrashuvda qurol-yarogʻ, giyohvand va psixotrop moddalarning noqonuniy aylanishiga, jumladan Internet tarmogʻi orqali qarshi kurashish, shuningdek ekstremizm va kiberjinoyatchilikka qarshi kurash hamda xalqaro tezkor axborot almashinuvini kuchaytirish choralari muhokama qilindi.
Uchrashuv konstruktiv va ishchan ruhda oʻtdi, ishtirokchilar transmilliy jinoyatchilikka qarshi kurashda oʻzaro hamkorlikni yanada mustahkamlash va tajriba almashishdan manfaatdor ekanliklarini bildirdilar.
IIV Axborot xizmati