Kibersport boʻyicha “Kelajak oʻyinlari” musobaqasi gʻoliblari aniqlandi
2025-06-12 13:00:00 / Yangiliklar
Ichki ishlar organlarining iqtidorli va isteʼdodli yosh xodimlarni aniqlash, ular oʻrtasida sogʻlom raqobat muhitini shakllantirish orqali ularning ijodiy, kasbiy va intellektual salohiyatini roʻyobga chiqarishlari uchun “Yoshlar oyligi” doirasida 2025-yilning 9-10-iyun kunlari Toshkent shahrida kibersport boʻyicha “Kelajak oʻyinlari” musobaqasi oʻtkazildi.
Musobaqa ikkita shartdan iborat boʻlib, birinchi sharti – virtual makonda bahslashish musobaqasi poytaxtning Mirzo Ulugʻbek tumanida joylashgan “Kiber arena”da, amaliy qismi esa Yashnobod tumanida joylashgan “Steak ball”da oʻtkazildi.
Musobaqada jami 18 ta jamoa qatnashgan boʻlib, har bir jamoada 5 nafardan iborat ishtirokchilar oʻzaro kuch sinashishdi.
Mazkur turnir yosh xodimlarda jangovar shaylikni oshirish, jamoa boʻlib qaror chiqarish, hamjihatlikda ishni tashkillashtirish, strategik rejalar tuzish hamda jangovar, taktik tayyorgarlik bilimi, koʻnikmalarini samarali qoʻllash imkonini berdi.
Bellashuvlar yakuniga koʻra jamoaviy hisobda Buxoro viloyati 3-oʻrinni, Toshkent shahri 2-oʻrinni, Qoraqalpogʻiston respublikasi jamoasi 1-oʻrinni qoʻlga kiritdilar.
Toshkent shahar IIBB da boʻlib oʻtgan gʻoliblarni taqdirlash marosimida IIV rahbariyati va musobaqa ishtirokchilari qatnashdi.
Ularga diplom, esdalik sovgʻalari va pul mukofotlari tantanali ravishda topshirildi.
Toshkent shahar IIBB Axborot xizmati