“Eng yaxshi hududiy ichki ishlar organi boshligʻi” nominatsiyasi boʻyicha tanlov eʼlon qilinadi
2025-06-12 12:00:00 / Yangiliklar
Oʻzbekiston Respublikasi Vazirlar Mahkamasining 2021-yil 24-avgustdagi “Ichki ishlar organlarida eng yaxshi xodimlarni aniqlash boʻyicha respublika tanlovini tashkil etish chora-tadbirlari toʻgʻrisida”gi 539-son qarori talablari asosida tanlov va musobaqalar asosida shaxsiy tarkib oʻrtasida sogʻlom raqobat muhitini shakllantirib, eng isteʼdodli kadrlarni aniqlash, ularni munosib ragʻbatlantirish maqsadida,
- “Eng yaxshi hududiy ichki ishlar organi boshligʻi” nominatsiyasi boʻyicha tanlovlarning dastlabki saralash (Qoraqalpogʻiston Respublikasi, Toshkent shahar va viloyatlar miqyosidagi) bosqichi 1-25-avgust kunlari oraligʻida, Respublika bosqichi 5-25-sentyabr kunlari oraligʻida oʻtkaziladi.
Tanlov Oʻzbekiston Respublikasi Vazirlar Mahkamasining 2021-yil
24-avgustdagi 539-son qarori talablari asosida quyidagi mezonlar asosida oʻtkaziladi:
– jismoniy va jangovar tayyorgarlik;
– IQ (intellektual koeffitsiyent) va individual psixologik xususiyatlari darajasini aniqlash;
– test sinovlari;
– yakka tartibdagi suhbat;
– yakuniy baholash.
Tanlovda ishtirok etish uchun nomzodlar hududiy IIV-IIBB-IIB Maʼnaviy-maʼrifiy ishlar va kadrlar bilan taʼminlash xizmatlari hamda Tashkiliy boshqarmalariga murojaat qilishlari mumkin.
Roʻyxatdan oʻtish joriy yilning 31-iyul kuni yakunlanadi.
Tanlovning respublika final bosqichi gʻoliblari 25-oktyabr – “Ichki ishlar organlari xodimlari kuni” munosabati bilan oʻtkaziladigan tadbirda tantanali ravishda taqdirlanadilar.