Xizmatlarda. Bagʻrikenglik siyosati
2025-06-08 23:00:00 / Yangiliklar
Andijon viloyati respublikadagi eng chekka hududlardan hisoblansada, bu yerga dunyoning koʻplab mamlakatlari fuqarolari kelib ketadi. Masalan, joriy yilning 5 oyi davomida 12485 nafar xorij fuqarosi yashash uchun vaqtincha roʻyxatga qoʻyildi.
Ular orasida dunyoning 50 ta davlatidan kelgan vakillar bor. Eng koʻp yon va jon qoʻshni Qirgʻiz Respublikasi fuqarolari boʻlsa, undan keyingi oʻrinlarni Turkiya, Xitoy, Tojikiston, Qozogʻiston, Turkmaniston va AQSHdan kelgan shaxslar tashkil etadi. Roʻyxatdan Ispaniya, Germaniya, Buyuk Britaniya kabi bir qator Yevropa mamlakatlari hamda Bahrayn, Jazoir, Marokash, Misr kabi Osiyo davlatlaridan tashrif buyurgan mehmonlar ham oʻrin olgan.
Ular asosan ish, biznes, sayohat, oilaviy aloqalar va mehmondorchilik maqsadlarida qadam ranjida qilgan. Viloyatda Hindiston va Pokistondan kelib, taʼlim olayotgan 1000 nafar talaba ham vaqtinchalik roʻyxatda turadi.
Viloyat IIB Migratsiya va fuqarolikni rasmiylashtirish boshqarmasi muhim topshiriqlar boʻyicha inspektori, kapitan Jahongir Mullayev bergan maʼlumotlarga qaraganda, bugun mamlakatimizda chet davlatlar bilan yoʻlga qoʻyilgan keng qamrovli hamkorlik ortidan xorijliklarning yurtimizga kelib, vaqtincha yashash imkoniyatlari kengaydi.
Masalan, Qozogʻiston fuqarolarining Oʻzbekistonda vaqtincha roʻyxatda turish muddati bir oyga uzaytirildi.
Viloyatda fuqaroligi boʻlmagan shaxs (FBSH)larni fuqarolikka qabul qilish jarayonlari osonlashdi. 2016-yildan shu kunga qadar 3 mingga yaqin fuqaroligi boʻlmagan shaxs Prezidentning tegishli farmonlari asosida fuqarolikka qabul qilingan boʻlsa, 2022-yildan boshlab mingdan ortiq shaxslarning fuqaroligi tan olindi.
Bu esa koʻrsatilayot-gan bagʻrikenglik siyosati natijasida FBSH hujjatiga ega boʻlgan fuqarolar deyarli qolmaganini, bunday maqomdagi shaxslar yurtimizning toʻlaqonli fuqarolariga aylanganligini bildiradi.
Bugun migratsiya xizmatlari va fuqarolikni rasmiylashtirish jarayonlari mutlaq yangicha dastur asosida faoliyat koʻrsatmoqda. Xizmatlar onlayn tizim orqali amalga oshirilayotgani uchun murojaatlarning hal etilish davri jadallashdi.
Avvalgidek navbat kutishlar yoʻq. Hududiylik tamoyilning joriy etilishi fuqarolarga kerakli xizmatlardan foydalanish uchun oʻziga qulay migratsiya boʻlimlariga murojaat qilish imkonini berdi. Toʻlovlar ham billing tizimi orqali, xodimlarning aralashuvisiz amalga oshirilmoqda.
Xulosa shuki, yurtimizga kelayotgan xorijiy mehmonlar va yurtdoshlarimizning bizdan rozi boʻlishlari uchun barcha sharoit muhayyo.
©️ “Postda” gazetasi, Nigoraxon Toʻxtamatova, Andijon viloyati.