Toshkent viloyati ichki ishlar organlari xodimlari va oila aʼzolari uchun madaniy konsert dasturlari tashkil etildi
2025-06-06 09:00:00 / Yangiliklar
Oʻzbekiston Respublikasi Ichki ishlar vazirligining farmoyishiga asosan, ichki ishlar organlari xodimlari, ishchi-xizmatchilari va faxriylar uchun madaniy-maʼnaviy dam olish tadbirlari tashkil etildi.
Shuningdek, xizmat vazifasini bajarish chogʻida halok boʻlgan yoki nogiron boʻlib qolgan xodimlarning oilalarini moddiy va maʼnaviy qoʻllab-quvvatlash maqsadida bir qator tadbirlar amalga oshirildi.
Xususan, Toshkent viloyatining Chirchiq, Olmaliq, Yangiyoʻl shahri va Boʻka tumanidagi madaniyat muassasasi va stadionda konsert dasturlari oʻtkazildi.
Ularda IIV Madaniyat saroyi qoshidagi ashula va raqs ansambli, sozandalar va badiiy soʻz ustalari ishtirok etdi. Tadbirlar viloyatdagi barcha tuman va shahar ichki ishlar boʻlinmalari xodimlarini qamrab oldi.
Konsertlar davomida xizmat burchi yoʻlida halok boʻlgan xodimlar yodga olindi, ularning oila aʼzolariga hurmat koʻrsatildi. Shuningdek, mehnat faxriylari va faol xodimlar ham eʼtirof etildi.
Tadbirlar xodimlarning maʼnaviy hordiq chiqarishiga xizmat qilgani va ijobiy ruhiy kayfiyat uygʻotgani bilan ahamiyatli boʻldi. Ular ichki ishlar organlari xodimlarini qoʻllab-quvvatlash va ijtimoiy himoyasini kuchaytirishga qaratilgan ishlar doirasida oʻtkazildi.
Toshkent viloyati IIBB Axborot xizmati