IIV akademiyasi va Markaziy Osiyo sunʼiy intellekt assotsiasiyasi (AICA) oʻrtasida hamkorlik memorandumi imzolandi
2025-05-29 07:05:00 / Yangiliklar
Shu munosabat bilan boʻlib oʻtgan uchrashuvda assotsiasiya boshqaruvi raisi Vladimir Norov va akademiya rahbari Rustam Xatamov atroflicha fikr almashdilar.
Hozirgi globallashuv sharoitida sunʼiy intellekt texnologiyalari jamiyat hayotining barcha jabhalarini qamrab olayotgani, sohada qoʻllanilayotgan innovatsion yondashuvlar taraqqiyotning jadal surʼatlarda oʻsishiga muhim omil boʻlayotgani taʼkidlandi.
AICA boshqaruvi raisi V. Norov davlatimiz rahbari tomonidan ayni sohaga alohida eʼtibor qaratilayotgani, keyingi yillarda sunʼiy intellekt texnologiyalarini joriy etish va rivojlantirishga doir qator hujjatlar, xususan, “Sunʼiy intellekt – 2030” strategiyasi qabul qilingani, bu borada assotsiasiya tomonidan ustuvor maqsad va vazifalar belgilab olinganini qayd etdi.
Muloqot chogʻida ichki ishlar organlari faoliyatida sunʼiy intellektdan foydalanish istiqbollari, bu borada yechimini kutayotgan masalalar, kelgusidagi vazifalar, taʼlimni raqamlashtirishning afzalliklari haqida soʻz bordi.
Akademiya rahbari taʼlim jarayoniga raqamli texnologiyalarni keng joriy etish faoliyatning asosiy yoʻnalishlardan biri ekanligini taʼkidlab, soʻnggi yillarda amaliyotga tatbiq qilingan innovatsion yondashuvlar, xususan, “Smart-akademiya” plaformasi doirasida amalga oshirilayotgan maqsadli chora-tadbirlarga toʻxtalib oʻtdi. Shu yerning oʻzida assotsiatsiya vakillariga taʼlim muassasasidagi yangilanishlarga bagʻishlangan videorolik namoyish etildi.
Tomonlar ilgʻor tajriba va yutuqlarni oʻrganish muhimligini eʼtirof etgan holda Markaziy Osiyo sunʼiy intellekt assotsiasiyasi va IIV akademiyasi oʻrtasidagi hamkorlik memorandumini imzoladilar.
Shundan soʻng mehmonlar Taʼlim sifatini monitoring va nazorat qilish markazi, magistraturada yoʻlga qoʻyilgan oʻquv jarayonlari, Maʼnaviyat va maʼrifat markazi hamda Axborot-resurs markazining zamonaviy imkoniyatlari bilan tanishib, oʻquv tezkor-tergov guruhlari uchun moʻljallangan maxsus transport vositalarini koʻzdan kechirdilar.
Ichki ishlar organlari uchun yuqori malakali kadrlar tayyorlash, taʼlim va ilmiy faoliyatni rivojlantirishga qaratilgan ilgʻor yondashuvlar mehmonlar tomonidan alohida eʼtirof etildi.
Shu kunning oʻzida AICA boshqaruvi raisi Vladimir Norov magistratura tinglovchilari va professor-oʻqituvchilari bilan ham uchrashdi. Muloqotda kibermakonda yuzaga kelayotgan zamonaviy tahdid va xatarlar, axborot texnologiyalari yordamida sodir etilayotgan jinoyatlarga qarshi kurashishda sunʼiy intellekt imkoniyatlaridan foydalanish, huquqni muhofaza qiluvchi organlar faoliyatiga raqamli texnologiyalarni keng joriy etish masalalari yuzasidan fikr almashildi.
Tadbir ishtirokchilari assotsiatsiyaning maqsad va vazifalari, faoliyati toʻgʻrisidagi taqdimot bilan tanishdilar.
IIV akademiyasi Axborot xizmati