O‘zbеkiston Rеspublikаsi Ichki ishlаr vаzirligi

“Vatan ravnaqi, tinchligi va himoyasi yoʻlidagi qahramonlik unutilmaydi”. Ayni kunlarda "9-may - Xotira va qadrlash kuni" munosabati bilan oʻtkazilayotgan tadbirlarda Ikkinchi jahon urushi faxriylari, qatnashchilari koʻrsatgan jasorat yosh avlodga yana bir bor oʻrnak va namuna boʻlib, bugungi osuda kunlarimizga shukronalik hissini uygʻotmoqda.

Xalqimiz tinchligi, mamlakatimiz ravnaqi yoʻlida jasorat va fidoyilik koʻrsatgan yurtdoshlarimizni xotirlash, ayni vaqtda hayot boʻlgan urush va mehnat faxriylariga hurmat-ehtirom koʻrsatishga qaratilgan tadbirlar butun mamlakatmiz boʻylab koʻtarinki ruhda oʻtkazilmoqda. Ichki ishlar vazirligi rahbartiyati masʼullar va jamoatchilik faollari bilar birga poytaxtimizda istiqomat qilib kelayotgan Ikkinchi jahon urushi qatnashchilari, front va front orti faxriylari xonadonlarida boʻlib, Prezidentimizning bayram tabriklarini yetkazishdi. Leningrad qamalida boʻlgan Zagida Mamleyevaga ham “Ikkinchi jahon urushidagi gʻalabaning 80-yilligi” yubiley medali tantanali ravishda topshirilib, bayram sovgʻalari ulashildi. Xonadonga tashrif buyurganlar onaxon bilan samimiy suhbat qurishdi.

Yuz yillik dovonni bosib oʻtgan Anna Karimova ayni vaqtda Chilonzor tumanida istiqomat qiladi. 1924-yilda Rossiyada tugʻilgan Ikkinchi jahon urushi qatnashchisining keyingi taqdiri Toshkent bilan bogʻlandi. Shu yurt rivoji uchun mehnat qildi, umr kechirdi. Quvonch yoshlari koʻzida qalqiyotgan Anna Georgiyevna bugungi nurafshon, tinch va osuda kunlarga shukrona keltiradi.

Nadejda Kudrizkayaning bolalik paytlari konslagerda oʻtgan. Millionlab oilalarni ota-onasidan ayirgan urushning mashʼum xotiralari uning murgʻak qalbida muhrlangan. Chilonzor tumanida umrguzaronlik qilayotgan 98 yoshli faxriyga bayram tabriknomasi oʻqib eshittirilib, sovgʻalar topshirildi.

Keyingi tashrif manzili Chilonzor tumani Choʻponota mavzesi boʻldi. Qarisi bor uyning parisi bor deganlaridek, farishtali bu manzilda istiqomat qiluvchi Mariya Degtyarovaning xonadonidan mehr nuri porlab turibdi. Prezident tabrigini tinglar ekan, bolaligi snaryadlar shovqini ostida oʻtgan ayolning qalbida kechgan tuygʻular yuzida namoyon boʻldi. Kamtarin hayot, mehnatga hamohang oʻtgan umr yoʻli va bugunidan minnatdorlik tuygʻularining ifodasini u kabi faxriylarning har birining nigohida koʻrish mumkin.

Ichki ishlar vazirligi rahbariyati tashrif buyurgan yana bir xonadonda umrguzaronlik qilayotgan Burыkin Anatoliy Ivanovich ham tinchlikning qadrini barchamizdan koʻra yaxshiroq anglaydi, yurak-yurakdan his etadi. U bilan kechgan samimiy uchrashuvda, bugungi osoyishta kunlarga yetib kelganidan baxtiyorligi, unga berilayotgan eʼtibordan koʻngli shod ekanligini aytib, mehmonlarga minnatdorlik bildirdi.

Urush ayniqsa bolalarning taqdirida oʻchmas iz qoldirgan mashʼum hodisa sifatida tarixdan joy olgan. Ana shunday taqdiri bilan Alla Fintikova barcha goʻdaklar qatori tugʻruqxonada emas konslagerda dunyoga keldi. Onaxonning Yashnobod tumanidagi xonadoniga tashrif buyurgan mehmonlar uning bolalik hikoyalarini tinglab, oʻziga xos xulosa chiqarishdi. Alla Semenovnaga yetkazilgan tabrik va sovgʻalari xonadon sohibasiga bayramona kayfiyat ulashdi.

Ichki ishlar vazirligi rahbariyati nuroniy faxriylar bilan koʻrishib, ular uchun yaratilgan zaruriy shart-sharoitlar, salomatliklari hamda muammolarini ham oʻrganishdi. Orkestr tomonidan ijro etilgan kuy-qoʻshiqlar esa mahalla ahliga ham koʻtarinki kayfiyat bagʻishladi. Bu kabi tadbirlar respublika miqyosida hududiy ichki ishlar organlari rahbarlari ishtirok davom etmoqda.