Ichki ishlar organlarida raqamli texnologiyalarni joriy etish va kiberjinoyatlarga qarshi kurashish tizimini takomillashtirish boʻyicha yigʻilish boʻlib oʻtdi
2025-05-06 08:00:00 / Yangiliklar
Unda Oʻzbekiston Respublikasi Prezidenti Administratsiyasining masʼullari, Ichki ishlar vaziri va sohaviy xizmatlarning mutasaddilari hamda prokuratura organlarining rahbariyati ishtirok etdilar.
Tadbirda, Oʻzbekiston Respublikasi Prezidentining “Axborot texnologiyalari yordamida sodir etiladigan jinoyatlarga qarshi kurashish faoliyatini yanada kuchaytirishga qaratilgan chora-tadbirlar toʻgʻrisida”gi hamda “Ichki ishlar vazirligida Raqamli texnologiyalar va huquqiy statistika departamentini tashkil etish chora-tadbirlari toʻgʻrisida”gi qarorlari va ularda belgilangan ustuvor vazifalar oʻqib eshittirildi.
Taʼkidlanishicha, jamiyatda jinoyatchilikning yangi shakllari, kiberjinoyatlar va axborot tahdidlarining ortib borishi ortidan huquqni muhofaza qilish organlari faoliyatida raqamli texnologiyalarni joriy etish strategik zaruratga aylanmoqda.
Oʻzbekiston Respublikasi Prezidentining qarorlariga asosan, mazkur jarayonning huquqiy, tashkiliy va texnik asoslarini takomillashtirish, mamlakatimizda amalga oshirilayotgan “Raqamli Oʻzbekiston – 2030” strategiyasi doirasida huquq-tartibot idoralari tizimidagi raqamli islohotlarni rivojlantirish, xalqaro tajribalar asosida istiqbolli taklif va tavsiyalar ishlab chiqish, raqamli texnologiyalar yordamida inson huquqlarini taʼminlash samaradorligini oshirish, fuqarolarga xizmat koʻrsatish sifatini yaxshilash hamda korrupsiyaga qarshi kurashda zamonaviy yondashuvlarni joriy etish imkoniyatlarini kengaytirish vazifalari belgilanib, bu borada masʼul davlat organlari, tashkilotlar, banklar, toʻlov tizimi operatorlari va toʻlov tashkilotlarining aniq masʼuliyati va javobgarligi kiritilmoqda.
Shuningdek, Davlat rahbarining qaroriga asosan Ichki ishlar vazirining axborot texnologiyalari boʻyicha oʻrinbosari lavozimi tugatilib, Ichki ishlar vazirining oʻrinbosari — Raqamli texnologiyalar va huquqiy statistika departamenti rahbari lavozimi kiritildi, ushbu lavozimga polkovnik Zufar Kurbanov tayinlandi.
Yigʻilishda, ichki ishlar organlari tizimini raqamli transformatsiya qilish masalalari, bu jarayonning asosiy yoʻnalishlari va kelgusidagi rivojlanish istiqbollari muhokama qilindi, masʼullarning taklif va mulohazalari tinglandi.