Haj va Umra ziyoratlariga yuborish bilan aldab mablagʻlarni oʻzlashtirish bilan bogʻliq holatlar yuzasidan oʻtkazilgan tezkor tadbirlarda firibgarlik yoʻli bilan talab qilingan pullarni olayotgan gumonlanuvchilar ushlandi
2025-04-30 09:00:00 / Yangiliklar
Ichki ishlar organlari va boshqa huquq tartibot idoralari tomonidan joylarda fuqarolarni noqonuniy ravishda Haj va Umra ziyoratlariga yuborish bilan aldab mablagʻlarni oʻzlashtirish bilan bogʻliq holatlar yuzasidan tezkor tadbirlar oʻtkazilmoqda.
Andijon viloyati va Toshkent shahrida oʻtkazilgan tezkor tadbirlardan firibgarlik yoʻli bilan talab qilingan pullarni olayotgan gumonlanuvchilar ushlangan boʻlsa Yakkasaroy tumani faoliyat yuritgan turistik tashkilotdan 101 nafar fuqarolar jabrlanganligi aniqlandi.
Andijon viloyati IIB tezkor xodimlari tomonidan oʻtkazilgan tezkor tadbirda 1986-yilda tugʻilgan shaxs qoʻlga olindi. U “Turistik firmasi” orqali 2025-yilgi “Haj” ziyoratiga fuqarolarni yuborish boʻyicha, har bir ziyoratchi uchun 5.000 AQSH dollaridan narx belgilagan. Unga murojaat qilgan mijozning 3 nafar qarindoshlarini Xajga yuborish uchun jami 15.000 AQSH dollari qilib berishini aytib, aldab kelishilgan pullardan jami 6.000 AQSH dollarini firibgarlik yoʻli bilan olgan vaqtida ashyoviy dalillar bilan ushlandi. Mazkur holat yuzasidan Jinoyat kodeksining 168-moddasi 4-qismi “a” bandi bilan jinoyat ishi qoʻzgʻatildi.
Toshkent shahrida yashovchi 1997-yilda tugʻilgan ayol arizachi va uning 2 nafar tanishlarini Haj va Umra ziyoratiga olib borish evaziga har bir fuqaro uchun 4850 AQSH dollaridan talab qilgan. U Sergeli tumanida kimyoviy ishlov berilgan 14.550 AQSH dollarini olgan vaqtida tadbir ishtirokchilari tomonidan ushlangan.
Ichki ishlar vaziri nomiga ariza bilan murojaat qilgan fuqaro Yakkasaroy tumani, faoliyat yurituvchi “KAVSAR TRAVEL” MCHJ direktori Umra ziyoratiga yuborgan fuqarolarning Madina shahridagi mehmonxonaga toʻlashi uchun 850 AQSH dollarini unga toʻlatishga erishib, shu kunga qadar pullarni qaytarmaganligini maʼlum qilib, qonuniy chora koʻrishni soʻragan.
Bundan tashqari, xuddi shu MCHJ direktori Umra ziyoratiga borish uchun 70 nafar fuqarolarning umumiy qiymati 42 ming 625 AQSH dollariga teng boʻlgan aviachiptalarni olib ketib, pullarini shu kunga qadar bermasdan kelgan.
Holat yuzasidan jinoyat kodeksining 168 moddasi 4 qismi “a” “b”, bandlari bilan jinoyat ishi qoʻzgʻatilib ayni vaqtda mazkur MCHJdan zarar koʻrgan fuqarolarning soni 101 nafar ekanligi aniqlangan. Jamiyat direktori qamoqqa olinib ayni vaqtda tergov harakatlari davom ettirilmoqda.
Hurmatli fuqarolar agar siz ham xuddi shu kabi holatlarga guvoh boʻlsangiz, yoki Xaj va Umra ziyoratiga yuboraman deb vaʼdasini bajarmagan jismoniy va yuridik shaxslardan jabrlangan boʻlsangiz hududiy ichki ishlar organlariga yoki 102 raqami orqali xabar berishingizni soʻraymiz.
Unutmang Xaj ziyoratini tashkil etish uchun mamlakatimizda faqatgina Oʻzbekiston Musulmonlar idorasi vakolatli hisoblandi.
Umra ziyoratlari uchun esa maxsus litsenziyaga ega boʻlgan sayyohlik tashkilotlariga murojaat qiling.