Oʻzbekiston voleybol federatsiyasining navbatdan tashqari Konferensiyasida Ichki ishlar vaziri general-mayor Aziz Toshpoʻlatov federatsiya raisi etib saylandi
2025-04-09 15:00:00 / Yangiliklar
Soʻnggi yillarda mamlakatimizda sportni ommalashtirish, yoshlarni sport bilan shugʻullanishlari uchun barcha sharoitlarni yaxshilash masalasi davlat siyosati darajasiga koʻtarildi.
Mazkur tizimli ishlarning uzviy davomi sifatida Ichki ishlar vazirligi Akademiyasida boʻlib oʻtgan Voleybol federatsiyasining navbatdan tashqari konferensiyasida Ichki ishlar vazirligi, Sport vazirligi, Milliy olimpiya qoʻmitasi rahbariyati, hududiy ichki ishlar organlari masʼullari, voleybol federatsiya mutasaddilari va uning hududiy vakillari, sport faxriylari ishtirok etishdi.
Konferensiyani Sport vaziri Adham Ikramov kirish soʻzi bilan ochib, voleybol sport turini rivojlantirish borasida amalga oshirilayotgan ishlar natijasida mamlakatmiz nufuzli musobaqalariga mezbonlik qilayotganligi, eng muhimi voleybol xalqimiz orasida ommalashib borayotganligini eʼtirof etib oʻtdi.
Shundan soʻng yigʻilish kun tartibidagi asosiy masalaga oʻtildi. Unda Oʻzbekiston Respublikasi Ichki ishlar vaziri, general-mayor Toshpulatov Aziz Anvarovichning nomzodi Oʻzbekiston voleybol federatsiyasi raisi lavozimiga taklif etildi va konferensiya ishtirokchilari tomonidan bir ovozdan maʼqullanib, federatsiyasi raisi etib saylandi.
Kun tartibiga koʻra Voleybol federatsiyasining Andijon, Buxoro, Namangan, Qashqadaryo, Surxondaryo, Sirdaryo, Xorazm va Toshkent shahrining hududiy boʻlimlari raisligiga nomzodlarni saylash taklif etildi.
Ushbu viloyatlar IIBlari boshliqlari va Toshkent shahar IIBB boshligʻi bir ovozdan hududiy boʻlimlar raisligiga saylandi.
Shuningdek, mazkur tadbir davomida Oʻzbekiston Respublikasi Prezidentining 2022-yil 11-apreldagi “Mahallalarda istiqomat qiluvchi yoshlarni ommaviy sportga keng jalb qilishni yangi bosqichga olib chiqish chora-tadbirlari toʻgʻrisida”gi PQ-201-son qarori ijrosini taʼminlash maqsadida “Besh tashabbus olimpiadasi” doirasida oʻtkazilishi rejalashtirilgan sportning voleybol turi boʻyicha “Ichki ishlar vaziri kubogi” musobaqalariga tantanali start berildi.