Yoshlar oʻrtasida jinoyatchilikka qarshi kurashish profilaktik tadbirlari tashkil etilmoqda
2025-04-07 23:50:00 / Yangiliklar
Barkamol avlodni voyaga yetkazish, yoshlarga doimiy gʻamxoʻrlik qilish mamlakatimizda amalga oshirilayotgan siyosatning eng muhim va ustuvor yoʻnalishlaridan biridir.
Oʻzbekiston yoshlari bugungi kunda nafaqat respublika, balki dunyo miqyosida oʻzining aql-zakovati, shijoati, intellektual salohiyati, kelajakka intiluvchanligi bilan eʼtibor qozonmoqda.
Yangi Oʻzbekistonda yoshlar siyosatini zamon talabidan kelib chiqib takomillashtirishda Prezidentimiz Shavkat Mirziyoyevning tashabbuslarini alohida taʼkidlash lozim. Davlatimiz rahbarining yoshlar kamolotiga qarayotgan doimiy eʼtibori, ayniqsa, taʼlim islohotlarida yaqqol koʻzga tashlanmoqda.
Afsuski, amalga oshirilayotgan islohotlarga qaramasdan, soʻnggi vaqtlarda yoshlar oʻrtasida sodir etilayotgan jinoyatlar salmogʻi sezilarli darajada yuqoriligicha qolmoqda.
Yoshlar orasida tan jarohati yetkazish va bezorilik jinoyatlarni sodir etilishi – bugungi kunning dolzarb muammolaridan biriga aylanib bormoqda.
Tahlillarga koʻra, 2024-yil 12 oy yakunlari bilan Toshkent shahrida jami 4 722 nafar yoshlar tomonidan 5 582 ta jinoyat sodir etilib, ushbu koʻrsatkich salmogʻi boʻyicha umumiy jinoyatning 17 foizini tashkil etmoqda.
Mazkur jinoyatlarning kelib chiqish sabablari oʻrganilganda:
– 27,7 foizi yengil daromad topishga qiziqishdan;
– 15,4 foizi moddiy yetishmovchilikdan;
– 13,4 foizi ishsizlikdan;
– 10,3 foizi jamiyatda oʻzining boshqalardan ustunligini koʻrsatishidan;
– 9,2 foizi tarbiyaviy yoki axloqan buzuqligidan;
– 24,6 foizi boshqa sabablarga koʻra sodir etilgan.
Ichki ishlar organlari xodimlari tomonidan tegishli tashkilotlar bilan hamkorlikda yoshlar oʻrtasida jinoyatchilikni oldini olishga qaratilgan maxsus profilaktik tadbirlarni amalga oshirib kelmoqda.
Xususan, Toshkent shahar IIBB va uning quyi tizim xodimlari tomonidan 2025-yilning ilk 2 oyi davomida oʻtkazilgan “Tigʻ” maxsus profilaktik tadbirlari davomida oʻtkir tigʻli jismlarni noqonuniy olib yurgan 2 644 nafar fuqarolar aniqlangan boʻlib, shulardan 85 foizi aynan yoshlarni tashkil etmoqda.
Tadbirlar jarayonida 1 996 nafar fuqarolarga maʼmuriy tartibda hujjatlar rasmiylashtirib jarima va maʼmuriy qamoq choralar koʻrildi.
Maʼlumot oʻrinda, noqonuniy ravishda oʻtkir tigʻli buyumlarni olib yurish Oʻzbekiston Respublikasi Maʼmuriy javobgarlik toʻgʻrisidagi kodeksining 1852-moddasida “sovuq qurolni yoki sovuq qurol sifatida foydalanilishi mumkin boʻlgan ashyolarni olib yurish” bazaviy hisoblash miqdorining bir baravaridan besh baravarigacha miqdorda jarima solishga sabab boʻladi. (375 ming dan 1 mln 875 mingacha)
Xulosa sifatida shuni qayd etish joizki, barchamiz Yurtboshimiz rahbarligida amalga oshirilayotgan siyosatni qoʻllab-quvvatlashimiz, shu aziz yurt, barchamiz uchun muqaddas boʻlgan Vatan uchun oʻzimizning munosib hissamizni qoʻshishimiz kerak.
Ichki ishlar organlari, taʼlim muassasalari, ota-onalar va davlat tashkilotlari birgalikda yoshlarni vatanparvarlik, fuqarolik tuygʻusi, bagʻrikenglik, qonunlarga, milliy va umuminsoniy qadriyatlarga hurmat ruhida, zararli taʼsirlar va oqimlarga qarshi tura oladigan, hayotga boʻlgan qatʼiy ishonch va qarashlarga ega shaxs sifatida tarbiyalash, yoshlarda sogʻlom turmush tarziga intilishni shakllantirish, shuningdek, yoshlarning boʻsh vaqtlarini mazmunli tashkil etish va yoshlar sportini ommaviy rivojlantirish uchun shart-sharoitlar yaratish, umuman olganda, yoshlar oʻrtasida tan jarohati yetkazish va bezorilik jinoyatchilikning oldini olish uchun qonunchilikni tushuntirish va axloqiy qoidalarni targʻib qilish muhim ahamiyatga ega.
Atrofdagi voqea-hodisalarga teran tafakkur va vazminlik bilan munosabatda boʻlish, ularni har tomonlama chuqur tahlil qila olish kundalik vazifamizga aylanishi kerak.
Yoshlar Yangi Oʻzbekistonda yashayotgan millionlab tengdoshlarini sogʻlom va erkin fikrlash, yangidan-yangi tashabbuslar bilan chiqish, maʼnaviy-maʼrifiy, madaniy, ijtimoiy-huquqiy, harbiy vatanparvarlik, sport-sogʻlomlashtirish kabi sohalarda ijodiy faol boʻlishga, shuningdek, bu borada eng maqbul loyihalarni ishlab chiqib hayotga tatbiq etishga daʼvat qilmogʻi lozim.
Zavqiddin XOʻJANOV,
IIV Akademiyasi tashkiliy strategik boshqaruv magistratura yoʻnalishi tinglovchisi, podpolkovnik