IIV Markaziy apparati xodimlari uchun Navroʻz tuhfasi: Arzonlashtirilgan yarmarka tashkil etildi
2025-03-21 12:45:00 / Yangiliklar
Bahoriy yangilanish va saxovat timsoli boʻlgan Navroʻz bayrami arafasida Ichki ishlar vazirligi markaziy apparati xodimlari uchun maxsus yarmarka tashkil etildi. Tadbirning asosiy maqsadi xodimlarni bayram oldidan sifatli va arzon mahsulotlar bilan taʼminlash, ularning bayram shukuhini yanada oshirishdan iborat boʻldi.
Yarmarkada turli oziq-ovqat mahsulotlari, qandolatchilik buyumlari, meva-sabzavotlar hamda maishiy tovarlar arzon narxlarda taqdim etildi.
IIV markaziy apparati xodimlari va ularning oila aʼzolari ushbu yarmarkada faol ishtirok etib, kerakli mahsulotlarni qulay narxlarda xarid qilishdi. Bayram oldidan bunday tadbirning oʻtkazilishi xodimlar kayfiyatini koʻtarib, Navroʻz bayramiga boʻlgan tayyorgarlikni yanada maroqli va mazmunli oʻtkazishga xizmat qildi.
– Yarmarka juda qulay tashkil etilibdi. Mahsulotlar nafaqat sifatli, balki ancha arzon ekan. Yaqinlashib kelayotgan Navroʻz bayramini oilamiz bilan koʻtarinki kayfiyatda kutib olishimiz uchun yaxshi imkoniyat yaratildi, – deydi yarmarka ishtirokchilaridan biri, Ichki ishlar vazirligi xodimi.
Shuni alohida taʼkidlash joizki, bu kabi tadbirlar xodimlarning ijtimoiy farovonligini oshirish, ularni qoʻllab-quvvatlash va Navroʻz bayramining mehr-oqibat, saxovat ruhini yanada keng yoyish maqsadida muntazam ravishda tashkil etib kelinmoqda.
Mazkur yarmarka ham Ichki ishlar vazirligi tizimida xizmat qilayotgan fidoyi insonlarning bayram oldidan yanada koʻtarinki ruhda boʻlishiga xizmat qildi.