O‘zbеkiston Rеspublikаsi Ichki ishlаr vаzirligi

Videoselektor shaklida tashkil etilgan tadbirda viloyat hokimi Normat Tursunov, sohaga oid vazirlik va hamkor tashkilotlarning masʼullari, sektor rahbarlari hamda viloyat hududidagi barcha mahallalarning yettiliklari toʻliq tarkibda ishtirok etdilar.

Taʼkidlanishicha, respublika mahallalarida xavfsiz muhitni yaratish va huquqbuzarliklarning barvaqt oldini olish tizimi samaradorligini yanada oshirish maqsadida Davlat rahbarining mazkur qarorida joriy yilda amalga oshirilishi lozim boʻlgan aniq vazifalar oʻrin olgan, ularning ijrosini taʼminlash qatʼiy nazorati belgilangan.

Jumladan, qaror talablaridan kelib chiqib, Navoiy viloyatida huquqbuzarliklar profilaktikasi boʻyicha har bir tuman va shahar kesimida 330 ta mahallaga oid “Yoʻl xaritalari” tasdiqlangan boʻlib, shulardan kriminogen vaziyati ogʻir boʻlgan 54 ta mahallalar tuman-shahar sektor rahbarlariga, prokuratura, ichki ishlar organlari va Milliy gvardiya qoʻriqlash xizmati boshliqlariga nomma-nom biriktirilgan.

Shuningdek, respublika ishchi guruhining manzilli oʻrganish ishlari davomida xususan, Ichki ishlar vazirligi Akademiyasi rahbari boshchiligidagi professor-oʻqituvchilar tomonidan “qizil” toifaga kiritilgan 54 ta mahalladagi kriminogen vaziyat tahlil qilinib, unda 239 dan ortiq jinoyatlarning asl omillari ilmiy-amaliy jihatdan oʻrganildi va mahallalar kesimida 50 ta yangi “jinoyat oʻchoqlari” aniqlanib, ushbu hududlarni barqarorlashtirish boʻyicha yoʻl xaritalariga kiritish uchun takliflar taqdim qilindi.

Viloyat mahallalarida kriminogen vaziyatni barqarorlashtirish hamda yangicha yondashuvlar asosida huquqbuzarliklarning barvaqt oldini olish tizimini tashkil etish boʻyicha, masalan Navoiy, Zarafshon shaharlari, Karmana, Qiziltepa, Xatirchi, Uchquduq tumanlarida “Xavfsiz va raqamli mahalla”, Karmana tumanida “Namunali xavfsiz koʻcha”, Karmana tumanida “Xavfsiz maktab”, Navoiy shahrida “Probatsiya va profilaktik hisobdagi shaxslarni sogʻlom turmush tarziga qaytarish”, Xatirchi va Karmana tumanlarida “Xavfsiz bozor”, Navoiy shahri va Nurota tumanida “Xavfsiz yoʻlak”, Navoiy shahar, Karmana, Xatirchi, Navbahor, Nurota tumanlarida “Xavfsiz koʻcha”, Navoiy va Zarafshon shaharlarida “Xotin-qizlar orasida jinoyatchilikning barvaqt oldini olish” namunalarini yaratish rejalashtirildi.

Ichki ishlar vazirligi tomonidan profilaktika kichik inspektorlari, migratsion profilaktika boʻlinmalari, maʼmuriy amaliyot guruhlari va profilaktika bosh inspektorlari lavozimlarini joriy qilish hamda tegishli shtat birliklarini shakllantirish vazifasi topshirildi.

Tadbir davomida mutasaddi rahbarlarning, mahallalarda yoshlar, ayollar va ishsizlar tomonidan, shuningdek, oila-turmush munosabatlari doirasida sodir etiladigan jinoyatlarni barvaqt oldini olish hamda hozirda keng tus olgan kiberjinoyatga qarshi kurashish boʻyicha targʻibot ishlarini kuchaytirish borasidagi fikr-mulohazalari tinglandi va amalga oshirilishi zarur boʻlgan masalalar muhokama qilindi.

Tadbir soʻngida viloyat hokimi tomonidan qaror ijrosini taʼminlashga qaratilgan chora-tadbirlar yuzasidan aniqlangan kamchiliklarni bartaraf etish borasida masʼul rahbarlarga aniq vazifalar yuklatilib, ijro muddatlari belgilab berildi.

IIV Axborot xizmati