IIV Akademiyasi va Qatar politsiya akademiyasi oʻrtasida hamkorlik bitimi imzolandi
2025-01-29 08:30:00 / Yangiliklar
Doha shahrida oʻtgan uchrashuvda taʼlim muassasalari vakillari ikki tomonlama hamkorlikning bugungi holati va istiqbollari yuzasidan muloqot qildilar.
Qatar politsiya akademiyasi rahbari Abdulrahmon Majid al-Sulaiti davlatlarimiz oʻrtasidagi aloqalar yuksak ishonch ruhi bilan rivojlanib borayotgani, taʼlim sohasida hamkorlikni yoʻlga qoʻyish kelgusidagi maqsadlar sari muhim qadam boʻlishini eʼtirof etdi.
Delegatsiyamiz rahbari, IIV akademiyasi boshligʻi oʻrinbosari Ruftullo Nigmatov zamonaviy taraqqiyot yoʻlidan borayotgan Qatar Davlatining raqamli texnologiyalar, kiberxavfsizlik, zamonaviy taʼlim va boshqa yoʻnalishdagi ilgʻor tajribalarini oʻrganish ijobiy natija berishini alohida taʼkidladi.
Uchrashuvda manfaatli yoʻnalishlarda aloqalarni kengaytirish masalalari muhokama qilinib, oʻzaro hamkorlik toʻgʻrisidagi hujjat imzolandi.
Qatar safari davomida vakillarimiz Qatar politsiya akademiyasi faoliyati bilan ham yaqindan tanishdilar. Oʻzaro muloqotda yuqori malakali kadrlar tayyorlash borasida Qatar va Oʻzbekiston tajribasining oʻziga xos jihatlari xususida maʼlumot almashildi.
IIV Akademiyasida tatbiq qilingan oʻqitish mexanizmlari qatarlik hamkasblarimizda ijobiy taassurot qoldirdi.
Shu bilan birga, delegatsiyamiz aʼzolari Doha politsiya departamenti, Qatar milliy muzeyi, Islom sanʼati muzeyida boʻlib, xorijiy taassurotlarini boyitdilar.
IIV Akademiyasi Axborot xizmati