IIV Tezkor-qidiruv departamenti xodimlari tomonidan poytaxt hududida kuchli taʼsir qiluvchi dori vositalarining noqonuniy savdosi bilan shugʻullanuvchi jinoiy guruh faoliyatiga chek qoʻyildi
2025-01-22 09:00:00 / Yangiliklar
Joriy yil 15-16-yanvar kunlari, Oʻzbekiston Respublikasi IIV Tezkor-qidiruv departamenti, DXX va Toshkent shahar IIBB tezkor xodimlari tomonidan Toshkent shahrining Sergeli va Yashnobod tumanlarida tezkor tadbirlar oʻtkazildi.
1993-yilda va 1999-yilda tugʻilgan ikki nafar shaxs Sergeli tumani, Xonobod koʻchasida toʻxtatilib tekshirilganda, ularning yonida 286 dona kuchli taʼsir qiluvchi dori vositalari borligi aniqlangan.
Tezkor tadbirlar davom ettirilib, ushlangan shaxslar mazkur dori vositalarni, telegram ijtimoiy tarmogʻidagi narkodoʻkondan olganligi maʼlum boʻldi va 16-yanvar kuni Yashnobod tumanida 1998 va 1999-yilda tugʻilgan shaxslar ushlanib, yashash manzili koʻzdan kechirilib, 857 dona kuchli taʼsir qiluvchi dori vositalari olindi.
Shuningdek Tadbir davomida, ushlangan shaxslar kuchli taʼsir qiluvchi dori vositalarni, 1996-yilda tugʻilgan, Jinoyat kodeksining 251 prim 1 -moddasi bilan sudlangan, shaxsga ham sotganligi maʼlum boʻldi.
U Olmos mahallasida toʻxtatilib tekshirilganda, yonida 500 dona dori vositalari borligi aniqlandi.
Oʻtkazilgan tezkor tadbirlar davomida chakana narxi 131,4 mln soʻmga teng boʻlgan jami 1 643 dona kuchli taʼsir qiluvchi dori vositalari olinib, tezkor tadbirlar davom ettirilmoqda.
IIV Tezkor qidiruv departamenti Axborot xizmati