IIV Akademiyasida poytaxt mahallalarida jinoyatchilikni jilovlash borasida amalga oshirilayotgan chora-tadbirlarga bagʻishlangan davra suhbati boʻlib oʻtdi
2025-01-10 09:00:00 / Yangiliklar
“Huquqbuzarliklar profilaktikasi faoliyati” ixtisoslik yoʻnalishida taʼlim olayotgan kursantlar uchun tashkil qilingan tadbirda Toshkent shahar IIBB boshligʻi oʻrinbosari Ikrom Tillayev hamda Huquqbuzarliklar profilaktikasi boshqarmasi boshligʻi oʻrinbosari Davron Ahmedov ishtirok etdi.
Soha vakillari mahallalarning kriminogen vaziyati, hududlarda jinoyatchilikni jilovlash, jamoat xavfsizligi va fuqarolar osoyishtaligini taʼminlash borasida amalga oshirilayotgan ishlar, huquqbuzarliklarning barvaqt oldini olishda “mahalla yettiligi” tizimi aʼzolarining vazifalariga toʻxtalib oʻtishdi.
Shuningdek, hududlarning kriminogen vaziyatiga salbiy taʼsir koʻrsatayotgan omillar tahlil qilinib, mahallalarda xavfsiz muhitni yaratish, aholining huquqiy madaniyatini yuksaltirish, ijtimoiy profilaktika samaradorligini oshirish hamda boshqa muhim yoʻnalishlarda qilinishi lozim boʻlgan ishlar yuzasidan fikr almashildi.
Davra suhbatida akademiya boshligʻi yordamchisi Ismoil Himmatov, Huquqbuzarliklar profilaktikasi faoliyati kafedrasi boshligʻi Sanjar Sharipov va boshqalar soʻz olib, kursantlarga zarur tavsiyalar berishdi. Faol yoshlar Toshkent shahar IIBB tomonidan kitoblar bilan ragʻbatlantirildi.
IIV Akademiyasi Axborot xizmati