Jumladan, joriy yilning 12-dekabr kuni Ichki ishlar vaziri general-leytenant Poʻlat Bobojonov boshchiligida soha masʼullari hamda hamkor tashkilotlarning mutasaddilari ishtirokida poytaxtimizning Shayxontohur va Yakkasaroy tumanlarining elektr tarmoq boʻlinmalari qoshida tuzilgan huquq-tartibot idoralari, hokimlik, kommunal-tezkor xizmatlar masʼullari hamda issiqlik energiya korxonalari rahbarlaridan iborat ishchi guruhlar tomonidan amalga oshirilayotgan ishlarning samaradorligi oʻrganildi.

Aholini kuz-qish mavsumida energiya taʼminoti (elektr, tabiiy va suyultirilgan gaz, issiq suv) bilan toʻliq taʼminlash, avariyaviy va boshqa noxush holatlarni zudlikda bartaraf etish choralarini taʼminlanganligini nazorat qilish maqsadida “Issiqlik elektr stansiyalari” AJning Shayxontohur tumanida joylashgan “Tashkent city” hududini elektr energiyasi bilan uzluksiz taʼminlash maqsadida barpo etilayotgan 110/35/10 kVA yangi podstansiyani ishga topshirish jarayoni, tumanning Oqilon mahallasida joylashgan tuman aholisini 468 ming Gkal issiqlik energiyasi bilan taʼminlaydigan 3-sonli IES faoliyati hamda Yakkasaroy tumani hududida joylashgan “Toshkent shahar issiqlik elektr markazi” mutasaddilarining ishi oʻrganildi.

Tadbir jarayonida elektr taʼminoti boʻyicha amalga oshirilgan chora-tadbirlarga qaramay, ayrim mahallalarda elektr uzilishlari haligacha muammo boʻlib qolayotganligi, bu esa nafaqat aholining kundalik turmush tarziga, balki tadbirkorlik subyektlarining faoliyatiga ham salbiy taʼsir koʻrsatayotganligi, tabiiy gaz taʼminoti boʻyicha esa ayrim hududlarda suyultirilgan gazni oʻz vaqtida yetkazib berishda kechiktirish holatlari kuzatilayotganligi taʼkidlanib, aniqlangan kamchiliklar bartaraf etish lozimligi taʼkidlandi.

Hududlarda kommunal tezkor xizmatlar va favqulodda vaziyatlar xizmatining murakkab yoki avariyaviy holatlarni zudlik bilan bartaraf etish faoliyatiga baho berish maqsadida Shayxontohur tumani Gulobod dahasi “Sarhumdon” mahallasi uchun “oʻquv tashvish” tadbiri eʼlon qilinib, masʼullarning tezkor ish jarayoni oʻrganildi. Aniqlangan kamchiliklar boʻyicha xizmat tekshiruvlarini tayinlab, qisqa muddatlarda bartaraf etish vazifasi qoʻyildi.

Shuningdek mahallada asosiy eʼtibor, hamkor tashkilotlar bilan birgalikda koʻp qavatli uylar, shaxsiy xonadonlar va jamoat joylarida videokuzatuv qamrovini oshirish, kriminogen vaziyatni chuqur tahlil qilish, profilaktika inspektorlari tomonidan aholi muammolarni oʻrganish hamda bartaraf etish boʻyicha “mahalla yettiligi” bilan yaqindan hamkorlikni yoʻlga qoʻyish boʻyicha koʻrilayotgan chora-tadbirlarga qaratildi.

Shuningdek, ishchi guruh tomonidan ob-havoning murakkab sharoitlarida aholiga benuqson xizmat koʻrsatilishi va xavfsizlik choralarini toʻliq taʼminlanishi vazifalarini oʻrganish uchun Yakkasaroy tumanida joylashgan “Seoul Mun Tashkent” gastronomik maskani hamda “Tashkent city” koʻngilochar bogʻidagi sharoitlar bilan tanishildi.

Tadbir davomida aniqlangan barcha kamchiliklar tanqidiy muhokama qilinib, kelgusida xizmat faoliyatini takomillashtirishga oid maqsadli chora-tadbirlar belgilab olindi.

Ishchi guruh aʼzolarining kundalik oʻrganish ishlari mamlakatimizning boshqa hududlarida ham davom etmoqda.