Departamentning 2024-yil 12-sentyabr kunidagi “Departament sohaviy xizmatlar tomonidan oʻz faoliyati boʻyicha jazoni ijro etish muassasalarni namunaviy tarzda tashkil etish toʻgʻrisida”gi Reja-jadvalga asosan, joriy yilning 5-dekabr kuni Buxoro viloyatida joylashgan Oltinchi mintaqaviy hudud 1-son jazoni ijro etish koloniyasida yopiq turdagi jazoni ijro etish koloniyalarining tarbiyaviy ishlar boʻlimi boshliqlari oʻrtasida tajriba almashish boʻyicha nazariy va amaliy mashgʻulotlar oʻtkazildi.

Tajriba almashishga jalb qilingan xodimlarning bilim saviyasini oshirish boʻyicha Departament Tarbiyaviy ishlarni tashkil etish boshqarmasi xodimlari tomonidan oʻquv-mashgʻulot oʻtkazilib, jazoni ijro etish muassasalarida mahkumlar bilan tarbiyaviy tadbirlarni tashkillashtirish, ular bilan doimiy ravishda profilaktik suhbatlar oʻtkazish hamda amalga oshirilgan ishlar yuzasidan hujjatlarni rasmiylashtirish tartibi oʻrgatildi.

Oʻquv yigʻilishdan soʻng, 1-son jazoni ijro etish koloniyasi boshligʻi podpolkovnik Z.Turdiyev, tartibot va tarbiyaviy ishlar boʻyicha boshliq oʻrinbosari podpolkovnik N.Kamalov hamda tarbiyaviy ishlar boʻlimi boshligʻi mayor B.Rasulovlar tomonidan koloniyada mahkumlar bilan tarbiyaviy tadbirlarni amalga oshirishda qilingan ishlar, yaratilgan sharoitlar xodimlarga tanishtirildi.

Tadbir yakunida tajriba almashishga jalb qilingan xodimlar tomonidan 1-son jazoni ijro etish koloniyasidan olgan tajribalari yuzasidan fikr almashdilar.

IIV huzuridagi Jazoni ijro etish departamenti Axborot xizmati