Jizzax viloyati Paxtakor tumani ichki ishlar boʻlimi hududida 14 ta xonaga ega qoʻshimcha maʼmuriy bino hamda vaqtincha saqlash hibsxonasi bunyodga keltirildi
2024-11-09 08:30:00 / Yangiliklar
Shu munosabat bilan oʻtkazilgan ochilish marosimiga davlat tashkilotlari hamda jamoatchilik vakillari, ichki ishlar organlari faxriylari taklif etildi.
Mazkur tadbir avvalida Ichki ishlar vaziri oʻrinbosari general-mayor Bekmurod Abdullayev hamda viloyat ichki ishlar boshqarmasi boshligʻi general-mayor Gʻayrat Qodirov soʻzga chiqdi.
Notiqlar tomonidan Yangi Oʻzbekistonning yangi ichki ishlar organlari tizimida amalga oshirilayotgan islohotlar, xususan, moddiy-texnik bazani mustahkamlash, soha vakillariga qulay xizmat sharoitlari yaratish borasida qilinayotgan ishlar tilga olindi.
Shuningdek, marosimda 2 nafar xodimga navbatdagi katta leytenant maxsus unvoni, bir nafar faxriyga “IIV faxriysi” koʻkrak nishoni, yana bir faxriyga tashakkurnoma topshirildi.
Soʻng ramziy lenta qirqilib, xodimlar uchun yaratilgan sharoitlar bilan tanishildi.
Maʼlumot oʻrnida aytish kerak, foydalanishga topshirilgan maʼmuriy binodan joy olgan migratsiya va fuqarolikni rasmiylashtirish hamda probatsiya guruhlari xizmat xonalari, murojaatchilarni qabul qilish, uzoq muddatga xorijga chiqqanlar bilan muloqot oʻtkazish xonalari, shaxsiy tarkib yotoqxonasi, navbatchilik oʻtkazish punkti hamda oshxona zamon talablari darajasida jihozlangan.
Xuddi shunday, saf, workout maydonlari hamda avtomashinalar saqlanadigan joy yuzaga keltirildi.
25 oʻrinli vaqtincha saqlash hibsxonasida esa gumon qilinuvchi va ayblanuvchilarni saqlash uchun barcha zaruriy sharoitlar yaratildi.
Qolaversa, 25 ta kuzatuv kamerasi hibsxona va uning tevaragini toʻliq nazorat qilishda qoʻl keladi.
Mazkur qurilmalar Ichki ishlar vazirligi, viloyat ichki ishlar boshqarmasi huquqbuzarliklar profilaktikasi boshqarmasi, tuman ichki ishlar boʻlimi navbatchilik qismlariga integratsiya qilingan.
Ichkaridagi videokameralar ovoz yozish xususiyatiga ega. Xonalarga ulangan toʻgʻridan toʻgʻri aloqa tizimi hibsxonada saqlanayotgan gumon qilinuvchi va ayblanuvchilar bilan muloqot qilish hamda muayyan vaqtlarda radio eshitish imkonini beradi.
Qisqasi, tizim moddiy-texnik bazasi izchil mustahkamlanmoqda.
Jizzax viloyati IIB Axborot xizmati