“25-oktyabr — Ichki ishlar organlari xodimlari kuni” bayrami hamda Oʻzbekiston Respublikasi ichki ishlar organlari tashkil etilganligining 33-yilligi bayrami munosabati bilan Samarqand viloyati IIBda tantanali tadbir oʻtkazildi
2024-10-31 11:55:00 / Yangiliklar
Mana 33-yildirki, ichki ishlar xodimlari el-yurt xizmatida. Xalqimizning osuda, emin-erkin shod-xurram hayot kechirishida qasamyodiga sodiq holda oʻz xizmat postida vazifalarini sidqidildan ado etishyapti. Yurt posbonlari, tinchligimiz qalqonlarining mashaqqatli mehnatlarini doimo yuksak qadrlaymiz. Viloyat ichki ishlar boshqarmasida oʻtkazilgan bayram tadbirida bu alohida eʼtirof etildi.
Insonning tugʻilgan joyi xoh sahro, xoh bogʻu-boʻston boʻlsin oʻzi uchun Vatan deb nomlangan tuproqni har tomonlama obod va ozod asrash, himoya qilish naqadar oliy va muqaddas burch, balki oʻz oʻrnida sharaf hamdir. Yurt tinchligi, hududlar osoyishtaligini taʼminlash, jinoyat va huquqbuzarliklarning oldini olish yoʻlida qatʼiyat, matonat va sergaklik bilan xizmat qilayotgan ichki ishlar organlari xodimlarining mehnati tahsinga sazovor. Kasb bayrami munosabati bilan viloyat ichki ishlar organlarida xizmat olib borayotgan bir guruh tantanali taqdirlandilar. Bugun bu mukofotlar tantanali tarzda topshirilmoqda.
Samarqand viloyati ichki ishlar boshqarmasida davlatimiz madhiyasi bilan boshlangan tantanali tadbirda viloyat hokimi Erkinjon Turdimov, viloyat prokurori, sektor rahbarlari va jamoatchilik vakillari hamda shaxsiy tarkib xodimlari ishtirok etdi. Boshqarma boshligʻi polkovnik Rahmat Mamatov Prezidentimiz rahbarligida yurtimizda jinoyatchilikka qarshi kurashish, huquqbuzarliklarning oldini olish, profilaktik chora-tadbirlarning samaradorligini oshirish, huquqni muhofaza qilish organlarining jamoatchilik bilan hamkorligini takomillashtirishning ahamiyatiga toʻxtalib oʻtdi. Tinchlikni mustahkamlash, jamiyatimizda qonun ustuvorligini taʼminlash, fuqarolarimizning huquq va erkinliklari, qonuniy manfaatlarini himoya qilishdek masʼuliyatli va sharafli xizmatni ado etayotgan soha xodimlari mehnati eʼtirof etildi. Faxriylarga hurmat ehtirom koʻrsatildi. Viloyat hokimi soha xodimlarining fidokorona xizmatlari olqishga munosib ekanligini taʼkidlab, bir guruh xodimlarga tashakkurnoma va esdalik sovgʻalarini topshirdi.
25-oktyabr ichki ishlar organlari xodimlari kuni munosabati bilan Prezidentimiz Shavkat Mirziyoyev Farmoniga koʻra, koʻp yillik samarali faoliyati, qonuniylikni taʼminlash borasidagi alohida xizmati uchun 2 nafar xodim podpolkovnik Joʻrabek Murodov “Jasorat”, podpolkovnik Farrux Indiaminov “Shuhrat” medali bilan taqdirlandi. Shuningdek, boshqarma boshligʻining tegishli buyrugʻiga muvofiq faol va tashabbuskor bir guruh xodimlar ham munosib taqdirlandilar.
Vatan himoyasi yoʻlida xizmat qilishni oliy saodat va yuksak gʻurur deb bilgan, oʻz oromi va halovatidan kechib el osoyishtaligini taʼminlayotgan soha xodimlarining fidokorona xizmatlari sabab yurtimizda tinchlik va osoyishtalik barqaror. Prezidentimizning “soʻnggi yillarda barcha mahallalarda xavfsiz, tinch va osoyishta muhit yaratish, hududlarda ilgʻor tajriba va amaliyotlarni joriy etish boʻyicha muhim natijalar qoʻlga kiritilayotganini taʼkidlash lozim” degan soʻzlari ham soha xodimlari oʻz kasbiga masʼuliyat bilan yondashayotganligining yorqin ifodasidir.
Tantanali tadbir soʻngida mehmonlarning tabrik soʻzlari eshitildi va tantanavor orkestr sadolari yangradi.
Samarqand viloyati IIB Axborot xizmati