Ichki ishlar vaziri tomonidan poytaxtda tungi xavfsizlikni taʼminlash boʻyicha olib borilayotgan ishlar oʻrganildi
2026-11-08 08:55:00 / Yangiliklar
Oʻzbekiston Respublikasi ichki ishlar vaziri tomonidan poytaxtimizda tungi vaqtda jamoat xavfsizligini taʼminlashga jalb etilgan ichki ishlar organlarining sohaviy xizmatlari hamda boshqa huquqni muhofaza qiluvchi idoralar xodimlarining hamkorlikdagi faoliyati oʻrganildi.
Oʻrganishlar davomida asosiy eʼtibor mamlakatimiz boʻylab oʻtkazilayotgan «Xavfsiz va sogʻlom yurt» keng qamrovli tezkor-profilaktik tadbirlarini sifatli va samarali tashkil etish, jamoat tartibini saqlash, huquqbuzarliklarning barvaqt oldini olish, shuningdek, tungi vaqtda aholi xavfsizligi va osoyishtaligini taʼminlashga qaratilgan chora-tadbirlar natijadorligiga qaratildi.
Xususan, aholi gavjum boʻlgan Shayxontohur tumanidagi «Tashkent City» majmuasida jamoat tartibini saqlash, mahalliy aholi va xorijiy sayyohlar uchun xavfsiz sharoitlar yaratish, yuqori saviyada xizmat koʻrsatish hamda koʻngilochar tadbirlarni xavfsiz tashkil etish borasida amalga oshirilayotgan ishlar joyiga chiqqan holda oʻrganildi.
Shuningdek, majmua hududidagi musiqali favvora, «Tashkent City» xiyoboni, «Tashkent City Mall» hamda «Park in Mall» koʻngilochar maskanlariga tashrif buyuruvchilar xavfsizligini taʼminlash yuzasidan koʻrilayotgan choralar tahlil qilindi.
Ichki ishlar vaziri tomonidan «Tashkent City» majmuasiga tashrif buyurayotgan xorijiy sayyohlar oqimi sezilarli darajada ortgani inobatga olinib, mazkur hududda xavfsiz turizmni taʼminlash boʻyicha maxsus otryad faoliyatini yoʻlga qoʻyish yuzasidan masʼullarga tegishli topshiriqlar berildi.
Shu bilan birga, tungi vaqtda aholi xavfsizligi va osoyishtaligini taʼminlashda muhim oʻrin tutuvchi tezkor harakatlanuvchi qoʻriqlash ekipajlari faoliyati oʻrganildi. Chaqiruv tugmalari orqali ekipajlarning tezkor harakatlanishga tayyorligi, hushyorligi va xizmatga shayligi amalda sinovdan oʻtkazildi.
Bundan tashqari, Mirzo Ulugʻbek tumanidagi Oʻzbekiston ovozi koʻchasida joylashgan, 24/7 rejimida faoliyat yurituvchi koʻngilochar maskanlar, umumiy ovqatlanish obyektlari, savdo va xizmat koʻrsatish shoxobchalari hududlarida jamoat xavfsizligini taʼminlash boʻyicha amalga oshirilayotgan ishlar koʻzdan kechirildi.
Mazkur hududlarda dam oluvchilar xavfsizligi, shuningdek, yaqin atrofda istiqomat qiluvchi aholi tinchligi va osoyishtaligini taʼminlashga alohida eʼtibor qaratilib, hududga biriktirilgan «Huquq-tartibot» maskani faoliyati tahlil qilinib, maskanda xizmat olib borayotgan profilaktika inspektorlari, patrul-post va qoʻriqlash xizmati xodimlari bilan suhbatlar oʻtkazilib, ularning xizmatni oʻtash va yashash sharoitlari oʻrganildi.