IIV Akademiyasi rahbariyati ishtirokida yoshlar oʻrtasida huquqbuzarliklarning barvaqt oldini olish masalalari muhokama qilindi
2026-11-07 09:00:00 / Yangiliklar

“Xavfsiz va sogʻlom yurt” keng qamrovli tezkor-profilaktik tadbirlari doirasida poytaxtimizdagi Geologiya fanlari universitetida yigʻilish oʻtkazildi.
Ichki ishlar vazirligi Akademiyasi boshligʻi Rustam Xatamov, universitet rektori maslahatchisi Ravshan Tolipov, Mirzo Ulugʻbek tuman IIO FMB boshligʻi oʻrinbosari Dilshod Ismoilbekov, “Yangi kamolot” mahalla fuqarolar yigʻini vakillari hamda talabalar ishtirokida oʻtgan yigʻilish yoshlar oʻrtasida huquqbuzarliklarning barvaqt oldini olishga bagʻishlandi.
Yigʻilishda respublikamiz mahallalarida xavfsiz muhitni shakllantirish, kriminogen omillarni aniqlash va bartaraf etish, aholi osoyishtaligini taʼminlash borasida amalga oshirilayotgan kompleks chora-tadbirlar haqida maʼlumot berildi. Amaliyotga yangi tizimning joriy qilingani natijasida jinoyatlar salmogʻi kamayib, kriminogen vaziyatni barqarorlashtirishda ijobiy koʻrsatkichlarga erishilayotgani taʼkidlandi.
Akademiya boshligʻi yoshlar tomonidan sodir qilinayotgan huquqbuzarliklarga alohida toʻxtaldi. Tahlillarga koʻra, yoshlar oʻrtasida bezorilik, giyohvandlik, tan jarohati yetkazish, firibgarlik bilan bogʻliq jinoyatlar koʻp qayd etilayotgani, ularning oldini olish uchun profilaktik ishlarni yanada kuchaytirish, yoshlar muammolarini hal qilish, ularning bandligini taʼminlash, oilalarda ijtimoiy-maishiy muhitni sogʻlomlashtirish, ayniqsa uyushmagan yoshlar bilan manzilli ishlash zarurligi aytib oʻtildi.
Yigʻilishda mahallalarda sodir etilgan ogʻir turdagi jinoyatlarning kelib chiqish omillari ham muhokama qilindi. Bunday holatlar qayta sodir etilishining oldini olish borasida ichki ishlar organi masʼullari va mahalla faollariga amaliy tavsiyalar berildi.
Muhokama yakunida mahallalarda xavfsiz muhitni yaratish, jinoyatchilikka barham berish, ijtimoiy profilaktika samaradorligini oshirish, yoshlar nazoratsizligining oldini olishga qaratilgan muhim vazifalar belgilab olindi.
IIV Akademiyasi Axborot xizmati









