Özbеkiston Rеspublikаsi Içki işlаr vаzirligi

Ichki ishlar vazirligida aholini suyultirilgan gaz bilan uzluksiz va sifatli taʼminlash borasida amalga oshirilayotgan ishlar, mavjud muammolar hamda yoʻl qoʻyilayotgan kamchiliklar muhokamasiga bagʻishlangan yigʻilish boʻlib oʻtdi.

Tadbirda Ichki ishlar vaziri general-leytenant Aziz Tashpulatov ishtirokida, vazir oʻrinbosarlari, sohaviy va hududiy xizmatlarning rahbarlari, «Hududgaztaʼminot» AJ va uning hududiy boʻlinmalari mutasaddilari, shuningdek “LPG-Trade” MCHJ masʼullari ishtirok etdilar.

Yigʻilishda kuz-qish mavsumida aholi xonadonlari va ijtimoiy soha obyektlarini energetika resurslari, jumladan, koʻmir, tabiiy va suyultirilgan gaz bilan barqaror taʼminlash, mahsulotlarning belgilangan manzilga oʻz vaqtida va toʻliq yetkazib berilishini nazorat qilish, taʼminot jarayonida yuzaga kelishi mumkin boʻlgan korrupsiyaviy holatlar, oʻzlashtirish va talon-torojliklarning oldini olish masalalari atroflicha koʻrib chiqildi.

Taʼkidlanganidek, kuz-qish mavsumida energetika resurslariga boʻlgan talabning ortishi ularni yetkazib berish, taqsimlash va isteʼmolchilarga yetkazish jarayonlarida qatʼiy nazoratni talab etadi. Bu borada har bir masʼul idora va tashkilotning vazifasi, vakolati hamda javobgarlik doirasini aniq belgilash, mavjud imkoniyatlarni bir maqsad yoʻlida safarbar etish muhim ahamiyat kasb etadi.

Ayniqsa, suyultirilgan gaz ballonlarini aholiga belgilangan grafik asosida yetkazib berish, ajratilgan resurslarning hisobini yuritish, tashish va tarqatish jarayonlarida shaffoflikni taʼminlash, isteʼmolchilardan asossiz toʻlovlar talab qilinishi yoki mahsulotning belgilangan meʼyordan kam yetkazib berilishi kabi holatlarga yoʻl qoʻymaslik zarurligi qayd etildi.

Yigʻilishning muhim yoʻnalishlaridan biri energetika resurslarini taqsimlash va yetkazib berish tizimida korrupsiyaviy holatlarning oldini olish boʻldi.

Jumladan, ajratilgan gaz va koʻmir mahsulotlarining haqiqiy hajmi bilan hisobotlarda koʻrsatilgan maʼlumotlar oʻrtasidagi tafovutlar, mahsulotlarning belgilangan isteʼmolchilarga yetkazilmasligi, soxta maʼlumotlar kiritish, mansab vakolatini suiisteʼmol qilish, noqonuniy vositachilik va boshqa qonunbuzilish holatlarini aniqlashga qaratilgan tezkor-profilaktik tadbirlarni kuchaytirish zarurligi qayd etildi.

Bu borada tegishli idoralar bilan axborot almashinuvini yoʻlga qoʻyish, kelib tushayotgan murojaatlarni har bir holat kesimida oʻrganish, aniqlangan huquqbuzarliklarga nisbatan qonunchilikda belgilangan choralarni koʻrish, ayniqsa, tizimli tus olgan kamchiliklarning kelib chiqish sabablarini bartaraf etish muhimligi taʼkidlandi.

Oʻtgan bir oy davomida amalga oshirilgan ishlar natijasida aniqlangan korrupsiyaviy holatlarga eʼtibor qaratildi.

Jumladan, koʻmir mahsulotini noqonuniy saqlash va oʻtkazish bilan bogʻliq jami 16 ta holatlar aniqlanib, jami 333 tonna 540 kg koʻmir mahsulotlari noqonuniy muomaladan musodara qilinib, aholiga ehtiyojlari uchun yetkazildi.

Shuningdek, suyultirilgan gazni noqonuniy saqlash, oʻtkazish bilan bogʻliq jami 374 ta holat aniqlanib, noqonuniy muomaladan jami 9 139 dona gaz ballonlari hamda 92 tn 936 kg suyultirilgan gaz musodara qilinib, aholi isteʼmoli uchun qaytarish choralari koʻrildi.

Masalan, oʻtkazilgan tezkor-qidiruv tadbirlari natijasida joriy yilning oktyabr oyida Samarqand viloyatida “Pastdargʻomtumangaz” gaz taʼminoti korxonasi xodimlari oldindan jinoiy til biriktirib, aholi isteʼmoli uchun ajratilgan uglevodorod gazi toʻldirilgan maishiy gaz ballonlarini maxsus transport vositalari yordamida talon-taroj qilayotganliklari aniqlanib, qiymati 32 mln soʻmlik jami 3 tonna 100 kg uglevodorod gaz mahsulotlari musodara qilingan.

Mazkur holat yuzasidan Samarqand viloyat IIB huzuridagi Tergov boshqarmasi tomonidan “Pastdargʻomtumangaz” gaz taʼminoti korxonasi xodimlariga nisbatan Oʻzbekiston Respublikasi JKning 167-moddasi 2-qismi “v” bandi bilan jinoyat ishi qoʻzgʻatilib, hozirda holatning boshqa tafsilotlari aniqlanmoqda.

Shu munosabat bilan ichki ishlar organlarining sohaviy xizmatlariga hamda hamkor tashkilotlarning mutasaddilariga vazifalar qoʻyildi.

Xususan, hududlarda taʼminot bilan bogʻliq muammolarni oʻrganish va huquqbuzarliklarning barvaqt oldini olish, energetika mahsulotlarining temir yoʻl orqali tashilishida yuklar butligi va manzilga yetib borishini nazorat qilish, ularni tashuvchi transport vositalari harakatining xavfsizligini taʼminlash, gaz toʻldirish shoxobchalari, omborlar va taqsimlash bazalarida qoʻriqlashni kuchaytirish, moddiy boyliklarning talon-toroj qilinishiga yoʻl qoʻymaslik choralarini koʻrish topshirildi.

Shuningdek, «Hududgaztaʼminot» AJ bilan hamkorlikda suyultirilgan gaz ballonlarini aholiga oʻz vaqtida yetkazib berish, mahsulot hajmi va taqsimotining hisobini yuritish, taʼminotdagi uzilishlar sabablarini aniqlash hamda isteʼmolchilar murojaatlarini hal etish, Transport vazirligi bilan birgalikda energetika mahsulotlarini tashish logistikasi va belgilangan yoʻnalishlarga rioya etilishini nazorat qilish vazifalari belgilandi. Koʻmir taʼminotiga masʼul tashkilotlar bilan esa mahsulotlarni qabul qilish, saqlash va aholiga yetkazish jarayonlarida hisobdorlikni taʼminlash yuzasidan hamkorlikni kuchaytirish zarurligi qayd etildi.

Yigʻilish yakunida masʼul xizmatlar va hamkor tashkilotlarga belgilangan vazifalar ijrosini qatʼiy nazoratga olish, hududlardagi holatni joyiga chiqqan holda oʻrganish va aniqlangan kamchiliklarni bartaraf etish boʻyicha koʻrsatmalar berildi.