Surxondaryoda kuz-qish mavsumiga tayyorgarlik: suyultirilgan gaz taʼminoti qatʼiy nazoratda
2026-11-02 20:00:00 / Yangiliklar
Aholi xonadonlarida issiqlik va xotirjamlikni taʼminlash, energiya resurslarining manzilli hamda oʻz vaqtida yetkazib berilishini nazorat qilish — dolzarb vazifalardan biridir.
Oʻzbekiston Respublikasi Ichki ishlar vazirining tegishli topshiriqlari ijrosini taʼminlash maqsadida Surxondaryo viloyati Ichki ishlar boshqarmasi boshligʻi tomonidan hududlarda kuz-qish mavsumiga tayyorgarlik jarayonlari oʻrganilmoqda.
Oʻrganishlar davomida aholi va ijtimoiy soha obyektlarini koʻmir hamda suyultirilgan gaz mahsulotlari bilan taʼminlash holatiga alohida eʼtibor qaratilmoqda. Shuningdek, ushbu muhim energiya resurslarining talon-toroj qilinishi va noqonuniy oʻzlashtirilishining oldini olish, taʼminot jarayonida shaffoflikni taʼminlash masalalari nazoratga olingan.
Dastlabki nazorat tadbirlari Muzrabot va Jarqoʻrgʻon tumanlaridagi suyultirilgan gaz toʻldirish hamda tarqatish stansiyalarida oʻtkazildi.
Jarayonda stansiyalarda yongʻin va texnik xavfsizlik qoidalariga amal qilinishi, maishiy gaz ballonlarini belgilangan tartibda toʻldirish, shuningdek, ularni tasdiqlangan grafik asosida aholiga oʻz vaqtida yetkazib berish holati atroflicha koʻzdan kechirildi.
Taʼkidlash joizki, bu kabi profilaktik va nazorat tadbirlarining asosiy maqsadi — qishning sovuq kunlarida aholini zarur energiya resurslari bilan uzluksiz taʼminlash, xalq manfaatlariga xizmat qilishi lozim boʻlgan mahsulotlarning talon-toroj qilinishiga yoʻl qoʻymaslikdan iborat.
Zero, har bir xonadonda issiqlik, har bir oilada xotirjamlik boʻlishi uchun taʼminot tizimida tartib, masʼuliyat va qonuniylik muhim ahamiyat kasb etadi.
Surxondaryo viloyatida kuz-qish mavsumiga tayyorgarlik, energiya resurslari taʼminoti va ularning saqlanishi ustidan nazorat tadbirlari viloyat IIB rahbariyati tomonidan hududlar kesimida izchil davom ettirilmoqda.
Surxondaryo viloyati IIB Axborot xizmati