Oʻzbekiston Respublikasi Ichki ishlar vazirligi hamda “Huawei Tech. Investment Tashkent” masʼuliyati cheklangan jamiyat shaklidagi xorijiy korxona oʻrtasida Anglashuv memorandumi imzolandi
2024-10-11 13:50:00 / Yangiliklar
Joriy yilning 11-sentyabr kuni Ichki ishlar vazirining axborot texnologiyalari boʻyicha oʻrinbosari polkovnik Zufar Qurbonov va “Huawei Tech. Investment Tashkent” masʼuliyati cheklangan jamiyat shaklidagi xorijiy korxona rahbari Chen Szyakay (Chen Jiakai) janoblari oʻrtasida uchrashuv boʻlib oʻtdi.
Tadbirda tomonlar ikki tomonlama hamkorlikni rivojlantirish, Oʻzbekiston Respublikasida jamoat xavfsizligini taʼminlash, kibermakonda huquqbuzarliklarning barvaqt oldini olish va jinoyatchilikka qarshi kurashish sohasiga ilgʻor raqamli texnologiyalarni joriy etish va innovatsion loyihalarni amalga oshirishda xorijiy korxona imkoniyatlaridan keng foydalanish kabi masalalarini muhokama qildilar.
Uchrashuvda Oʻzbekiston Respublikasi Ichki ishlar vazirligi hamda “Huawei Tech. Investment Tashkent” masʼuliyati cheklangan jamiyat shaklidagi xorijiy korxona oʻrtasida Anglashuv memorandumi imzolandi.
Ushbu kelishuvdan koʻzlangan maqsad — kiberjinoyatlarga qarshi kurashish, bulutli texnologiyalarda xavfsizlikni taʼminlash, sunʼiy intellektga asoslangan dasturiy taʼminotlar hamda “xavfsiz shahar” tizimida kiberjinoyatchilikning oldini olishga qaratilgan yechimlarni ishlab chiqish.
Doʻstona va konstruktiv ruhda oʻtgan uchrashuvda tomonlar oʻzaro hamkorlikni rivojlantirish borasida istiqbolli vazifalarni belgilab oldilar.