Buxoro viloyatida kuz-qish mavsumiga tayyorgarlik: Koʻmir va suyultirilgan gaz taʼminoti qatʼiy nazoratda
2026-11-01 18:50:00 / Yangiliklar
Oʻzbekiston Respublikasi Ichki ishlar vazirining tegishli topshiriqlari ijrosini taʼminlash maqsadida, Buxoro viloyati Ichki ishlar boshqarmasi boshligʻi tomonidan hududlarda kuz-qish mavsumiga tayyorgarlik holati, xususan, aholi va ijtimoiy soha obyektlariga koʻmir hamda suyultirilgan gaz mahsulotlarini yetkazib berish jarayonlari oʻrganildi.
Asosiy eʼtibor ushbu muhim energiya resurslarining talon-toroj qilinishining oldini olish va taʼminotning shaffofligini taʼminlashga qaratildi.
Dastlabki oʻrganish ishlari Kogon tumanida joylashgan "Mahalla tadbirkori" MCHJga qarashli koʻmir tarqatish omborida olib borildi. Mazkur bazadan Romitan, Kogon, Buxoro va Jondor tumanlari aholisi hamda muassasalariga koʻmir mahsulotlari tarqatiladi.
Oʻrganish davomida omborning toʻliq videokuzatuv kameralari bilan jihozlangani, hududning qoʻriqlovga olinganligi hamda tizimning raqamlashtirilganligi koʻzdan kechirildi.
Shuningdek, talon-torojliklarning oldini olish maqsadida jarayonlar Kogon tuman IIB tomonidan doimiy nazoratga olinganligi taʼkidlandi.
Maʼlumot oʻrnida aytish joizki, qish mavsumi uchun bugungi kunga qadar ushbu maskandan jami 961 740 tonna koʻmir mahsulotlari isteʼmolchilarga yetkazib berilgan.
Oʻrganishlar yakunida jarayonlarni yanada tartibli tashkil etish va xavfsizlikni taʼminlash yuzasidan boshqarma boshligʻi tomonidan masʼullarga tegishli topshiriq va koʻrsatmalar berildi.
Shundan soʻng, Kogon tumanida joylashgan yana bir obyekt – "Buxoro qurilish mollari" korxonasiga qarashli 2-koʻmir ombori faoliyati tekshirildi.
Ushbu ombor orqali Kogon tumani, Romitan va Peshku tumanlariga koʻmir mahsulotlari uzluksiz ravishda chiqarilmoqda.
Maskanda saqlanayotgan zaxira hajmi, texnik holat va transportirovka jarayonlari mutasaddilar ishtirokida batafsil oʻrganildi.
Tadbir davomida aholini suyultirilgan gaz bilan taʼminlash masalalari ham eʼtibordan chetda qolmadi.
Xususan, Kogon tumanidagi "Baxtli Sherzod" MCHJga qarashli suyultirilgan gaz toʻldirish va tarqatish stansiyasiga tashrif buyurildi.
Stansiyada yongʻin va texnik xavfsizlik qoidalariga rioya etilishi, maishiy gaz ballonlarini toʻldirish hamda ularni tasdiqlangan grafik asosida oʻz vaqtida hududlarga yetkazish ishlari qatʼiy nazoratdan oʻtkazildi.
Ushbu profilaktik va nazorat tadbirlaridan koʻzlangan asosiy maqsad – sovuq kunlarda xalqimizni issiqlik manbai bilan uzluksiz taʼminlash hamda davlat va xalq mulki boʻlgan mahsulotlarning noqonuniy oʻzlashtirilishiga mutlaqo yoʻl qoʻymaslikdir.
Bu boradagi chora-tadbirlar Buxoro viloyati IIB rahbariyati tomonidan hududlar kesimida davom ettirilmoqda.
Buxoro viloyati IIB Axborot xizmati