Özbеkiston Rеspublikаsi Içki işlаr vаzirligi

Tadbirda Ichki ishlar vaziri general-leytenant Aziz Tashpulatov, vazir oʻrinbosarlari, sohaviy xizmatlar va hududiy ichki ishlar organlari rahbarlari hamda shaxsiy tarkib ishtirok etdi.

Yigʻilish kun tartibiga koʻra joriy yilning 1-noyabrdan mamlakatimizda «Xavfsiz va sogʻlom yurt» keng qamrovli tezkor-profilaktik tadbirining uchinchi bosqichini oʻtkazish masalasi muhokama qilindi.

Taʼkidlanganidek, Davlatimiz rahbari tashabbusi bilan aholi salomatligi va millat genofondini giyohvandlik hamda narkojinoyatlardan himoya qilishga qaratilgan kompleks chora-tadbirlar amalga oshirilmoqda. Jumladan, tegishli Prezident farmoni asosida muntazam oʻtkazilayotgan «Xavfsiz va sogʻlom yurt» oyligi bu boradagi ishlarning muhim yoʻnalishi hisoblanadi.

Mazkur tadbirning ahamiyatligini quyidagi raqamlarda koʻrish mumkin. Joriy yilning 1-iyul — 15-avgust kunlari oʻtkazilgan tadbirning ikkinchi bosqichi natijalariga koʻra oldi olinishi lozim boʻlgan jinoyatlar 2 228 taga kamayishiga erishilgan. Jinoyat turlaridan qotillik, ogʻir tan jarohati yetkazish, talonchilik, bosqinchilik, firibgarlik va bezorilik jinoyatlari kamaydi. Ichki ishlar organlari xodimlarining tashabbusi bilan jinoyatlarni aniqlash 792 taga yaxshilangan.

Shuningdek, «qora bozor»dagi taxminiy qiymati 221,7 milliard soʻm boʻlgan 1,8 million doza (369,3 kilogramm) giyohvandlik vositasi, 66 ming dona kuchli taʼsir qiluvchi dori vositalari va 44 919 tup zahriqotil oʻsimlik aniqlanib, uchta noqonuniy narkolaboratoriya faoliyatiga chek qoʻyilgan. Kiberjinoyatchilik yoʻnalishida 438 ta jinoyat aniqlanib, fuqarolarga yetkazilgan 3,5 milliard soʻm zarar qaytarilgan. Bundan tashqari, 51 041 ta korrupsiyaviy holat, jumladan, 18 322 ta energiya resurslarini talon-toroj qilish va 4 710 ta yerdan noqonuniy foydalanish holati aniqlangan.

Yuqoridagilardan kelib chiqib, “Xavfsiz va sogʻlom yurt” keng qamrovli tezkor-profilaktik tadbirlarining qamrovini kengaytirish, narkojinoyatlarning oldini olish va ularni fosh etish, aholi, ayniqsa, yoshlar oʻrtasida sogʻlom turmush tarzini targʻib qilish belgilandi. Buning uchun huquqni muhofaza qiluvchi organlar, mahalliy hokimliklar va boshqa mutasaddi tashkilotlar hamkorligini kuchaytirish vazifasi qoʻyildi.

Tadbirni puxta tashkil etish masalalari boʻyicha Toshkent shahar Ichki ishlar bosh boshqarmasi rahbariyatining hisoboti tinglanib, Toshkent, Samarqand va Andijon viloyatlarida rejalashtirilayotgan ishlar hamda mavjud kamchiliklarni bartaraf etish yuzasidan topshiriqlar berildi.

Keyingi masala ichki ishlar organlarining maʼmuriy binolarini 2026–2027-yillar kuz-qish mavsumiga tayyorlash, isitish tizimlarining sozligini taʼminlash hamda elektr energiyasi va tabiiy gaz taʼminotida uzilishlarning oldini олишга bagʻishlandi.

Mavsumga tayyorgarlik doirasida binolar va muhandislik-kommunikatsiya tarmoqlarining texnik holatini tekshirish, aniqlangan nosozliklarni oʻz vaqtida bartaraf etish, yongʻin xavfsizligi talablariga rioya qilish hamda energiya resurslaridan oqilona foydalanish zarurligi taʼkidlandi.

Masʼul rahbarlarga tayyorgarlik ishlarini belgilangan muddatlarda yakunlash va mavsum davomida tizimlarning barqaror ishlashini nazorat qilish vazifalari yuklatildi.

Kuz-qish mavsumida aholini suyultirilgan gaz va koʻmir mahsulotlari bilan oʻz vaqtida taʼminlash, talon-tarojliklarni oldini olish hamda bu masalada tegishli vazirlik va idoralar bilan hamkorlikni kuchaytirish masalasi ham koʻrib chiqildi.

Yoqilgʻi mahsulotlarining belgilangan manzillarga toʻliq yetkazilishini taʼminlash, taqsimot jarayonida talon-toroj va noqonuniy savdo holatlarining oldini olish, fuqarolar murojaatlariga tezkor munosabat bildirish muhimligi qayd etildi.

Masʼul tashkilotlar bilan hamkorlikda taʼminotdagi muammolarni oʻz vaqtida aniqlash va bartaraf etish, muammoli hududlarda vaziyatni oʻrganish hamda fuqarolarning qonuniy manfaatlarini himoya qilish boʻyicha tegishli vazifalar belgilandi.

Yigʻilishda kiberjinoyatchilikka qarshi kurashish, uning oldini olish va sodir etilgan jinoyatlarni fosh etish boʻyicha topshiriqlar ijrosi ham tahlil qilindi.

Qayd etilganidek, bank kartalari va shaxsiy maʼlumotlarni qoʻlga kiritish, soxta havolalar orqali pul mablagʻlarini oʻzlashtirish, ijtimoiy tarmoqlardagi akkauntlarni egallash kabi jinoyatlar zamonaviy usullardan foydalangan holda sodir etilmoqda. Bu esa tezkor axborot almashinuvi, elektron dalillarni tahlil qilish va zamonaviy texnologiyalardan samarali foydalanishni taqozo etadi.

Oʻzbekiston kibermakonini himoya qilish, axborot texnologiyalaridan foydalangan holda sodir etilayotgan jinoyatlarni aniqlash va fosh etish maqsadida oʻtgan davrda 24 mingdan ortiq tezkor-texnik va tezkor-qidiruv tadbirlari oʻtkazildi.

Mazkur tadbirlar natijasida jami 17 490 ta axborot texnologiyalaridan foydalangan holda sodir etilgan jinoyat fosh etilib, oʻtgan yilning mos davriga nisbatan ushbu koʻrsatkich 251 foizga oshdi. Koʻrilgan chora-tadbirlar natijasida 18 mingdan ortiq fuqaroning buzilgan huquq va qonuniy manfaatlari tiklanib, ularga yetkazilgan 182 mlrd 176 mln soʻm miqdoridagi moddiy zararning oʻz egalariga qaytarilishi taʼminlandi.

Shu bilan birga, fuqarolarning bank hisob varaqlaridan mablagʻlarni noqonuniy yechib olishga qaratilgan, koʻplab fuqarolarga zarar yetkazayotgan 459 ta fishing turidagi zararli dastur aniqlanib, ularning faoliyatiga chek qoʻyildi. Buning natijasida soʻnggi 9 oy davomida 660 mingdan ortiq fuqaroning elektron qurilmalari va pul mablagʻlarini talon-toroj qilinishiga yoʻl qoʻyilmadi.

Kiberjinoyatlarning alohida xavfli yoʻnalishlaridan biri boʻlgan kripto-aktivlar aylanmasi sohasidagi qonunchilik buzilishi bilan bogʻliq 3 929 ta jinoyat aniqlanishi natijasida jinoiy yoʻl bilan topilgan 112,2 mlrd soʻmdan ortiq mablagʻlarni kripto-aktivlar shaklida respublika hududidan olib chiqib ketishining oldi olindi.

Shu munosabat bilan jinoyatlarni sodir etish usullarini tahlil qilish, ularga imkon bergan shart-sharoitlarni bartaraf etish va fuqarolarga yetkazilgan zararni qoplash choralarini kuchaytirish zarurligi taʼkidlandi. Aholining raqamli savodxonligini oshirish, shaxsiy maʼlumotlar va tasdiqlash kodlarini begona shaxslarga bermaslik yuzasidan profilaktik tushuntirish ishlarini kengaytirish vazifasi ham belgilandi.

Kun tartibidagi yana bir masala ichki ishlar organlari xodimlari oʻrtasida xizmat intizomini mustahkamlash, qonunchilikka rioya etilishini taʼminlash va mavjud kamchiliklarni bartaraf etishga qaratildi.

Xodimlarning xizmat vazifalarini qonun doirasida bajarishi, fuqarolar bilan muomalada odob-axloq qoidalariga amal qilishi hamda xizmat vakolatlarini suiisteʼmol qilmasligi ichki ishlar organlariga boʻlgan ishonchni mustahkamlashning muhim sharti ekani taʼkidlandi.

Intizomiy qoidabuzarliklarning oldini olish, ularni keltirib chiqaruvchi omillarni aniqlash, rahbarlarning shaxsiy tarkib ustidan nazoratini kuchaytirish va har bir qonunbuzilish holatiga nisbatan murosasiz munosabatda boʻlish zarurligi qayd etildi. Bu borada rahbarlarning shaxsiy masʼuliyatini oshirish va aniqlangan kamchiliklarning takrorlanishiga yoʻl qoʻymaslik boʻyicha tizimli ishlarni tashkil etish vazifalari belgilandi.

Yigʻilish yakunida kun tartibidagi barcha masalalar yuzasidan belgilangan vazifalar ijrosini oʻz vaqtida va sifatli taʼminlash, masʼul rahbarlar javobgarligini oshirish hamda amalga oshirilayotgan ishlarning natijadorligini nazorat qilib borish boʻyicha tegishli topshiriqlar berildi.